ئۆجه‌لان له‌باره‌ى مه‌زڵوم عه‌بدیه‌وه‌ چى بەشاندی ئیمراڵی وت؟

چه‌ند زانیارییه‌كى گرنگ له‌باره‌ى گفتوگۆى شانده‌كه‌ى ئیمراڵى‌و عه‌بدوڵڵا ئۆجه‌لان ئاشكراده‌كرێت، زانراوه‌ ئۆجه‌لان به‌شانده‌كه‌ى وتووه‌، "لەم جوگرافیایەدا کورد بەبێ تورک‌و تورکیش بەبێ کورد، ناتوانێت بژی"، له‌باره‌ى مه‌زڵوم عه‌بدیشه‌وه‌ زانیارییه‌كى گرنگى ئاشكراكردووه‌.

عەبدوڵڵا ئۆجەلان لەکۆبوونەوەی لەگەڵ شاندی کۆمیسیۆنە پەرلەمانییەکەی تورکیا جەختیکردووەتەوە، "پەکەکە دەبێت هەموو چەکەکانی دابنێت، نەک تەنها ئەو چەکانەی بەدەستییەوەن، بەڵکو دەبێت لەزهنییەتی خۆیشیدا چەک دابنێت، چونكه‌ لەم جوگرافیایەدا کورد بەبێ تورک‌و تورکیش بەبێ کورد ناتوانێت بژی".

لەکاتێکدا چاوەڕوانده‌كرا لە19مین کۆبوونەوەی کۆمسیۆنی یەکڕیزیی نیشتمانی، برایەتی‌و دیموکراسی، ناوەڕۆکی کۆبوونەوەکەی شاندە سێ ئەندامییەکەی کۆمیسیۆنەکە بخوێنرێتەوە کە 11 ڕۆژ لەمەوبەر لەگەڵ ئۆجەلان ئەنجامیاندابوو، بەڵام تەنها پوختەکەی لەلایەن ئەحمەد بۆزکورت یاریدەدەری سکرتێری پەرلەمانی تورکیا خوێنرایەوە.

ئۆجەلان لەکۆبوونەوەکەدا جەختیکردووەتەوە، "وەک ڕۆژی یەکەم پێداگرم لەسەر قسەکانم بۆ سەرخستنی پرۆسەی ئاشتی‌و ئەگەر هەلومەرج بڕەخسێنرێت، قسەکان دەبن بەکردارو كاریگه‌ریى خۆیشم لەسووریاو عێراقیش نیشانده‌ده‌م".

ئۆجەلان ئاماژەی بەوەداوە، "دەوڵەتی تورکیا دەوڵەتی هەموومانەو منیش ئاماده‌م بۆ خزمەتی ئه‌م دەوڵەته‌و ڕێز لەکەسوکاری سەربازە کوژراوەکانی تورکیاش دەگرین، کوژرانی هەر یەکێک له‌توركیا تراژیدیایه‌ چ تورك بێت یان كورد، بەتێپەڕینی کاتیش گومانەکانی ڕای گشتی لەسەر پرۆسەکە دەڕەوێنەوە".

ئۆجەلان وتوویه‌تى، "تورکیا هەنگاوی کردەیی دەنێت بۆ سەرخستنی پرۆسەکە، منیش بۆخۆم سەرۆکی پەکەکەم‌و ڕێنمایی دەده‌م بەسەرجەم ئەندامانی حزبه‌كه‌ لەهەر کوێیەکی ناوچەکەبن، ئەوەی لەتوانامدابێت دەیکه‌م بۆ سەرخستنی پرۆسەى ئاشتیى".

ئه‌وه‌ش ڕوونكرایه‌وه‌، لەوەڵامی پرسیاری ئەندامانی شاندەکەدا، ئۆجەلان ڕاشكاوانه‌ وتوویه‌تى، "داوای دەوڵەتی سەربەخۆ، فیدراڵی‌و مافی کولتووری ناکەین لەتورکیا".

ئۆجەلان باسى له‌وه‌شكردووه‌، "لە 1993وە بەپێویستم زانیووە پەکەکە هەڵبوەشێتەوە، بەڵام تەواوی ئەو هەوڵانە لەباربران کە پێشتر بۆ سەرخستنی پرۆسەی ئاشتی نران".

ئۆجەلان باسى له‌مه‌زڵوم عه‌بدى كردووه‌، وتوویه‌تى، "مەزڵوم عەبدی کەسێکی زۆر نزیکە له‌منه‌وه‌، لەگەڵ دەوڵەتێکی یەکگرتوو و یونیتەرو دیموکراتیی خۆجێی بۆ سووریام، بەپێویستیشی ده‌زانم هەسەدە پابەندبێت بەڕێککەوتنی 10ی ئادارو تێکەڵبوونی لەگەڵ ئیدارەی نوێی سووریا".

له‌به‌رده‌وامى باسى مه‌زڵوم عه‌بدى، ئۆجه‌لان جه‌ختیكردووه‌ته‌وه‌، "فەرهاد عەبدی شاهین (مەزڵوم عه‌بدى) گوێم لێدەگرێت، چونكه‌ وه‌كو وتم، یەکێکە لەکەسە نزیکەکانم‌و زۆریش پابەندە پێمه‌وه‌، بۆیه‌ وتوومه‌و دووباره‌ى ده‌كه‌مه‌وه‌، دەبێت ئەو هیچکات دژی تورکیا بانگەشەیەک نەکات کە نەتوانێت جێبەجێی بکات، چونكه‌ دواجار ئەمە پرۆسەکە تێکدەدات".