ڕۆژنامه‌نوسێكى تورك هه‌موو شتێك له‌باره‌ى دیداره‌كه‌ى ئۆجه‌لانه‌وه‌ ئاشكراده‌كات

ڕۆژنامه‌نوسێكى ناودارى تورك، هه‌موو شتێك له‌باره‌ى دیداره‌كه‌ى ئۆجه‌لان‌و كۆمسیۆنه‌كه‌ى په‌رله‌مانى ئه‌و وڵاته‌وه‌ ئاشكراده‌كات، ده‌شڵێت، "ئۆجه‌لان نه‌ك سازشى نه‌كردوه‌، به‌ڵكو مۆدێلێكى پێشكه‌وتوتر له‌وه‌ى له‌هه‌رێمى كوردستان هه‌یه‌ بۆ كوردانى باكورو توركیاى داواكردوه‌"، ڕاشیده‌گه‌یه‌نێت، "ئۆجەلان ڕەتیدەکاتەوە هەسەدە چەک دابنێت یان هەڵبوەشێتەوە".

سەیگی ئۆزتورک ڕۆژنامەنوسی ناودارى تورکیاو پارتی گەلی کۆماری (جەهەپە)یە، لەوتارێکدا کە لەڕۆژنامەی سۆزجو بڵاوکراوەتەوە، چەند زانیارییەکی لەبارەی وتوێژەکانی وه‌فدى کۆمسیۆنی ئاشتی‌و ئۆجەلان ئاشكراكردوه‌.

وه‌كو ڕۆژنامه‌نوسه‌ توركه‌كه‌ نوسیویه‌تى، "دوای زنجیرەیەک کۆبونەوەی چڕو گوێگرتن لە 134 کەسایەتی جیاواز، کۆمسیۆنی "هاودەنگیی نیشتمانی، برایەتی‌و دیموکراسی" لەتورکیا گەیشتە وێستگەی کۆتایی‌و هەستیارترین قۆناغی کارەکانی، کە بریتیبوو لەدیدار لەگەڵ عەبدوڵڵا ئۆجەلان لەدوورگەی ئیمراڵی".

ئەو دیدارە کە بەبەشداریی نوێنەرانی ئاکپارتی، مەهەپەو دەم پارتی بەڕێوەچوو، تەنها کۆتاییهێنان نەبوو بەقۆناغی گوێگرتن، بەڵکو خستنەڕووی پاکێجێکی گشتگیر بوو لەلایەن ئۆجەلانەوە کە دەستکاریی بنەڕەتی لەژێرخانی دەستووری-یاسایی، ئابووریی‌و سەربازیی تورکیاو دۆخی ڕۆژئاوای کوردستان دەکات. هەرچەندە وردەکارییەکان بەهۆی هەستیارییانەوە سانسۆر کراون‌و لەکۆنووسێکی 16 لاپەڕەییەوە تەنها چوار لاپەڕەیان بۆ ئەندامانی کۆمسیۆن ئاشکراکراوە، بەڵام ناوەڕۆکەکەی ئاماژەیە بۆ گۆڕانکاریی ڕیشەیی.

ئه‌و ڕۆژنامه‌نووسه‌ باس له‌وه‌ده‌كات، "لەچەقی داواکارییەکاندا بۆ باکووری کوردستان‌و تورکیا، ئۆجەلان چەمکی "وەچەرخانی دیموکراتیک"ی وەک کلیلی چارەسەر ناساندووە، ئەو پێداگری لەسەر ئەوەدەکات کە دەستووری تورکیا دەبێت لەو پێناسە تەقلیدییە دەربچێت کە تەنها دان بە"تورک"دا دەنێت‌و پێویستە بەڕوونی ئاماژە بەبوونی "دوو گەلی بەهێز" واتە تورک‌و کورد بکات، لەو چوارچێوەیەدا، گۆڕینی ماددەی 66ی دەستوور کە ناسنامەی هاووڵاتیبوون بەتورکبوونەوە دەبەستێتەوە، بەداواکارییەکی سەرەکی دادەنرێت".

ئه‌وه‌شى باسكردووه‌، "هاوتەریب لەگەڵ ئەمە، ئۆجەلان پرسی زمانی خستووەتە قۆناغێکی کردەییەوە؛ هەرچەندە لەم قۆناغەدا داوای زمانی فەرمی ناکات بۆ ئەوەی ڕای گشتی تورکیا نەشڵەژێنێت، بەڵام بەمەرجێکی بنەڕەتی داناوە کە زمانی پەروەردەو فێرکردن دەبێت بەزمانی دایک (کوردی) بێت، لەڕووی ئابووریی‌و ئیدارییەوە، داواکارییەکان ئاستێکی بەرزیان تۆمارکردووە کە تەنانەت سنووری داواکارییە کلاسیکییەکانیش دەبەزێنێت".

سەیگی ئۆزتورک ئه‌وه‌شى نووسیوه‌، "ئۆجەلان بەڕاشکاوی داوای جێبەجێکردنی پەیماننامەی ئەوروپی بۆ حوکمڕانیی خۆجێیی دەکات‌و خوازیاری مۆدێلێکی بەڕێوەبردنە کە لەمۆدێلی هەرێمی کوردستانی عێراق پێشکەوتووترو بەهێزتربێت، خاڵی هەرە سەرنجڕاکێش، داواکاریی "پشکی داهات"ە؛ بەوپێیەی نەوت‌و سامانە سروشتییەکانی وەک کارەبای بەنداوەکان کە لەناوچە کوردییەکان (کە ئەو بەکوردستان ناوی بردوون) بەرهەمدەهێنرێن، دەبێت بەشێک لەداهاتەکەیان بۆ حکومەتە خۆجێییەکانی ئەو ناوچانە بگەڕێتەوە، وەک نموونەی نەوتی چیای گابار، ئەمەش هەنگاوێکە بەرەو سەربەخۆیی ئابووریی ناوچەکان لەناوەندەوە".

سەبارەت بەدۆخی ڕۆژئاوای کوردستان‌و هێزەکانی سوریای دیموکرات (هەسەدە)، سەیگی ئۆزتورک باسى له‌وه‌كردووه‌، "ئۆجەلان دیدگایەکی تەواو جیاوازی لەگەڵ دەوڵەتی تورکیا خستووەتەڕوو".

لەکاتێکدا ئەنكەرە خوازیاری هەڵوەشاندنەوەی ئەو هێزانەیە، ئۆجەلان ڕەتیدەکاتەوە هەسەدە چەک دابنێت یان هەڵبوەشێتەوە، لەبەرامبەردا، پێشنیازدەکات کە ئەم هێزانە لەبری ئەوەی وەک سوپا بمێننەوە، گۆڕانکارییان بەسەردابێت‌و ببنە هێزی پۆلیس یان هێزی ئەمنی ناوخۆیی بۆ پاراستنی ناوچەکانی خۆیان، به‌بڕواى ڕۆژنامه‌نوس بڕوا ستار، "ئەمەش ئاماژەیە بۆ مانەوەی قەوارەی خۆبەڕێوەبەری لەڕۆژئاوا، بەڵام بەفۆرمێکی جیاواز، هاوکات، ئۆجەلان دانی بەوەداناوە کە هەرچەندە کاریگەریی مەعنەوی هەیە، بەڵام ناتوانێت بڕیاری "هەڵوەشاندنەوە" بەسەر یەپەگەو پژاکدا بسەپێنێت، ئەمەش وەک پەیامێک کە ئەو هێزانە خاوەنی ئیرادەی خۆیانن".

ڕۆژنامه‌نوس بڕوا ستار پێیوایه‌، "ئەم ڕاپۆرتەو داواکارییانە بوونەتە هەوێنی ئامادەکردنی ڕاپۆرتێکی هاوبەش لەپەرلەمانی تورکیا، ئامانجەکەش دروستکردنی "ژێرخانێکە" بۆ چارەسەر، بەڵام قورسیی داواکارییەکان، بەتایبەت ئەوانەی پەیوەستن بەدەستوورو داهاتی نەوت، ئاڵنگاریی گەورەن لەبەردەم پارتە سیاسییەکانداو قۆناغی داهاتوو دەریدەخات ئایا دەوڵەت ئامادەیە باجێکی وا گەورە لەپێناو چارەسەردا بدات یان نا".