كێشه‌ى دۆلارى سپى‌و شین چاره‌سه‌رده‌كرێت

کێشەی وەرگرتنی دۆلاری سپی‌و شین لەهاوڵاتیان لەبازاڕەکانی شارى هەولێر چارەسەرکرا، بەگوێرەی بڕیارێکی وەزارەتی ناوخۆ-یش هەر کەسێک پابەند نەبێت، لێپێچینەوەی لەگەڵدا دەکرێت.

لەناو بازاڕەکانی هەرێم، دیاردەیەک پەیدابووە کە دۆلاری سپی، دۆلاری کۆن‌و 50 دۆلاری، کەمتر لەنرخی دۆلار شین لەخەڵک وەردەگیرێت، ئەوەی چاپی کۆن‌و نوێکە، تەنانەت لەهەندێک شوێن ئامادەنین دۆلاری سپی وەربگرن.

ئەمە گرفتی بۆ هاونیشتمانیان‌و بازاڕەکانی دراو دروستکردووە، لەبەرئەوەی بڕێکی زۆری دۆلاری سپی لەبازاڕدا هەیەو بەشێکیشی هی بازارەکانی ناوەڕاست‌و باشووری عێراقە دەهێنرێتە هەولێر.

كەیفی خۆشناو وتەبێژی بازاڕی دۆلارفرۆشانی هەولێر ده‌ڵێت، "ڕۆژانە لەبەغداو ناوچەکانی دیکەی عێراقەوە دۆلاری سپی دەهێنرێتە نێو بازاڕی دراوی هەولێرەوە، بۆیە بەنووسراوی فەرمی داوامان لەلایەنە پەیوەندیدارەکان کردووە ڕێگە بەهاتنی دۆلاری کۆن نەدەن".

هاوکات بازرگان‌و خەڵکی دیکە دۆلاری شین لەهەولێرەوە دەبەنە بەغدا، واتە چاپی کۆن دەهێننە هەولێرو چاپی نوێ دەبەنە دەرەوە، بەمەش ڕێژەی دۆلاری چاپی کۆن لەبازاڕەکانی هەولێر زیادیکردووە.

بڕیارێکیش لەوەزارەتی ناوخۆ دەرچووە، بەپێی بڕیارەکە لەهەر دەفتەرێکدا، دەبێت حەوت هەزار دۆلار شین‌و سێ هەزار دۆلاری  سپی هەبێت، ئەمە ئاساییە، تەنانەت ئاساییە کە چوار پەنجا دۆلاریشی تێدابێت، پێویستە ئەوانەی ئاڵۆگۆڕی دراو دەکەن، لەخەڵکی وەربگرن‌و مامەڵەی پێوەبکەن، هەرکەسێک پابەندی ئەو بڕیارە نەبێت، لێپێچینەوەی لەگەڵدا دەکرێت.