وردەكاری بڕیاری ڕاگرتنی كارەكان و هەڵوەشاندنەوەی گرێبەستی كۆڕەك تیلیكۆم لەلایەن عێراقەوە

دەستەی ڕاگەیاندن و پەیوەندییەكانی عێراق، بڕیاریدا بە هەڵوەشاندنەوەی گرێبەستی رێككەوتنی لەگەڵ كۆمپانیای كۆڕەك تیلیكۆم، هەروەها پەنابردن بۆ ڕێوشوێنی یاسایی و تەكنیكی بەپێی یاسا و ڕاگرتنی سەرجەم پرۆسەكانی ئەو كۆمپانیایە.

دەستەی ڕاگەیاندن و پەیوەندییەكان ئاماژەی بەوەداوە، بڕیارەكە ڕاگرتنی سەرجەم پرۆسەكانی كۆمپانیا و ڕێوشوێنی یاسایی دژ بە سەروەت و سامانی كۆمپانیاكە دەگرێتەوە، ئەویش بەپێی چوارچێوەی یاسایی پاڵپشتیكراو، وە بە هەماهەنگی لەگەڵ لایەنی تایبەتمەند، لەپێناو پاراستنی مافی دەوڵەت و هاووڵاتیان و موڵكی گشتیی.

دەستەی ڕاگەیاندن و پەیوەندیەكان ڕوونیكردووەتەوە، بڕیارەكە بە پشت بەستن بووە بە بڕگەكانی (12-13-15 و 16) ی ماددەی پێنجی پابەندییەكانی لایەنی دووەم و ئامڕازی پارەدان لە گرێبەستنی ڕێككەوتن، ئەویش دوای سەلماندنی ئەوەی كۆمپانیا پابەندییەكان و مەرجەكانی گرێبەستەكەی جێبەجێ نەكردووە، هەرچەندە كات و هەلی پێویستی پێدراوە بۆ یەكلاكردنەوەی دۆخە یاساییەكەی و جێبەجێكردنی پابەندییە داراییەكانی رێككەوتنەكەی.

دەستەی ڕاگەیاندن و پەیوەندییەكانی عێراق دووپاتی دەكاتەوە، سەرجەم ڕێكارە یاسایی و رێكخستنی و تەكنیكیەكانی پێویست بۆ جێبەجێكردنی بڕیارەكەی دەگرێتەبەر و چاودێری شوێنەواری بڕیارەكەشی دەكات، ئەوەش بە هەماهەنگی لەگەڵ لایەنی نیشتمانی و نێودەوڵەتی كە پەیوەندیدارن بەو پرسە، ئەمەش لەپێناو پاراستنی مافی دەوڵەت و گێڕانەوەی موڵكی گشتیی و وەرگرتنەوەی قەرزەكان و جێبەجێكردنی پابەندییەكان بەسەر كۆمپانیاكەدا بەپێی یاسا دەرچووەكان.

دەستەكە رێوشوێنی پێویستیش دەگرێتەبەر بۆ وەرگرتنی سكاڵای بەشداربووانی كۆمپانیای كۆڕەك تیلیكۆم و لەڕووی یاساییەوە بەدواداچوونی بۆ دەكات، كۆمپانیاكەش سەرجەم بەرپرسیارێتی لێكەوتە یاسایی و داراییەكانی گرێبەستەكە لە ئەستۆ دەگرێت.

لە كۆتایی ڕاگەیەندراوەكەدا، دەستەی ڕاگەیاندن و پەیوەندییەكان، داوا لە لایەنە ڕەسمیی و ناڕەسمییەكان و هاووڵاتیان دەكات، بڕیارەكە لەبەرچاو بگرن و هیچ مامەڵە و گرێبەستێك لەگەڵ كۆمپانیای كۆڕەك تیلیكۆم ئەنجام نەدەن، دووپاتیشی دەكاتەوە كۆمپانیاكە سەرجەم بەرپرسیارێتییە یاسایی و داراییەكانی پەیوەست بە جێبەجێنەكردنی گرێبەستی رێككەوتن و شوێنەوارەكەشی لە ئەستۆ دەگرێت.

كێشەی سەرەكیی كۆمپانیای كۆڕەك تیلیكۆم لە عیراق پەیوەستە بە قەرز و ململانێی دارایی لەگەڵ دەستەی راگەیاندن و پەیوەندییەكانی عیراق، كە بەهۆی پابەندنەبوون بە دانەوەی قەرزە كەڵەكەبووەكان دروستبووە، قەرزەكەش بە زیاتر لە ملیارێك و 250 ملیۆن دۆلار دەخەمڵێنرێت.