شەڕی هورمز دەپەڕێتەوە هەرێمی کوردستان؛ هاوپەیمانان ۱۰ درۆنی بۆمبڕێژکراو لە ئاسمانی هەولێر دەخەنە خوارەوە

ئاڵۆزبوونی بەرچاوی ڕەوشی کەنداو؛ ئاڵوگۆڕی گورزی سەربازی لە نێوان ئەمریکا و ئێراندا

ململانێی سەربازیی نێوان ویلایەتە یەکگرتووەکانی ئەمریکا و کۆماری ئیسلامیی ئێران پێی ناوەتە قۆناغێکی زۆر مەترسیدارەوە، دوای ئەوەی هێزەکانی ئەمریکا زنجیرەیەک هێرشی بەرفراوانیان کردە سەر پێگە سەربازییەکانی سوپای پاسداران لە ناوچە کەناراوییەکانی باشووری ئێران و دەوروبەری گەرووی هورمز.

سیاسەتی نوێی واشنتن: "کەشتی لە بەرامبەر کەشتی"

 بەپێی زانیارییەکانی ماڵپەڕی "ئاکسیۆس" لە زاری بەرپرسانی ئەمریکییەوە، دۆناڵد ترەمپ سەرۆکی ئەمریکا ڕەزامەندی لەسەر جێبەجێکردنی سیاسەتێکی نوێی سەربازی بە ناوی "کەشتی لە بەرامبەر کەشتی" داوە. لەم چوارچێوەیەدا، فڕۆکە بێفڕۆکەوانەکانی ئەمریکا بۆ یەکەمجار دوو کەشتی نەوتهەڵگری حکومیی ئێرانیان لە باکووری هێڵی گەمارۆی دەریایی کردە ئامانج.

هێرشەکانی ئەمریکا زياتر لە ۱۰۰ ئامانجی سەربازییان پێکاوە، لەوانە: پێگەکانی بەرگریی ئاسمانی، رادارەکانی سوپای پاسداران، تواناکانی مینڕێژکردن، سەکۆکانی هەڵدانی مووشەکی کروز و فڕۆکەی بێفڕۆکەوان لە ناوچەکانی بەندەر عەباس، قشم، چابەهار، جەسک و سیریک.

دۆناڵد ترەمپ لە سەکۆی "ترووس سۆشیال" ڕایگەیاند، ئەم هێرشانە وەڵامێک بوون بۆ هەوڵەکانی ئێران بۆ بەئامانجگرتنی کەشتیوانیی بازرگانی و مینڕێژکردنی گەرووەکە. ترەمپ جەختی کردەوە کە ئەمریکا کۆنترۆڵی نیوەی گەرووی هورمزی کردووە و هۆشداری دا، ئەگەر تاران تۆڵە بکاتەوە، ڕووبەڕووی هێرشی بێپێشینە و زۆر توندتر دەبێتەوە.

وەڵامدانەوەی تاران و کاریگەرییە ناوچەیییەکان

 لە بەرامبەردا، سوپای پاسدارانی ئێران دەستپێکردنی ئۆپراسیۆنی وەڵامدانەوەی ڕاگەیاند و ئاماژەی بەوە کرد کە فڕۆکەیەکی بێفڕۆکەوانی پێشکەوتووی ئەمریکی لە جۆری (MQ-9) خستووەتە خوارەوە.

تاران بە هەڵدانی نزیکەی ٢٥ مووشەکی بالیستی و شاندنی دەیان فڕۆکەی بێفڕۆکەوان وەڵامی هێرشەکانی دایەوە کە بنکەکانی ئەمریکای لە بەحرێن، کوێت و ئوردن کردە ئامانج. هاوکات، دژەتیرۆری کوردستان ڕایگەیاند لە ماوەی دوو کاتژمێردا هێزەکانی هاوپەیمانان ۱۰ درۆنی بۆمبڕێژکراویان لە سنووری ئاسمانی پارێزگای هەولێر تێکشکاندووە و خستوویانەتە خوارەوە.

زیانە گیانییەکان و دۆخی ئابووری

 میدیای فەرمیی ئێران (ئێرنا) بڵاوی کردەوە، بەهۆی بۆردومانەکانی ئەمریکا بۆ سەر پارێزگاکانی هورمزگان و خوزستان، ۱۱ کەس کوژراون و ٥٨ کەسی دیکەش بریندار بوون، کە بەپێی وتەی بەرپرسانی خۆجێیی، چوار لە کوژراوەکان بەهۆی بەئامانجگرتنی ناوچەیەک لە شارۆچکەی کۆهستەک بووە.

لە لایەکی دیکەوە، سکۆت بێسێنت وەزیری گەنجینەی ئەمریکا جەختی لەسەر بەردەوامیی گوشارە ئابوورییەکان بۆ سەر تاران کردەوە. بەهۆی ئەم ئاڵۆزییانەشەوە، نرخی نەوتی خاو لە بازاڕەکانی جیهاندا بە ڕێژەی ۳٪ بەرزبووەوە و گەیشتە ۹٦ دۆلار بۆ هەر بەرمیلێک.

مەرجی چین بۆ نێوەندگیری

 لە پێشهاتێکی سیاسی پەیوەندیداردا، حسێن مەرعەشی، کەسایەتیی سیاسیی دیاری ئێران ئاشکرای کرد، حکومەتی چین سەردانیکردنی محەمەد باقر قالیباف سەرۆکی پەرلەمانی ئێرانی بۆ وڵاتەکەی بەستووەتەوە بە ڕاگرتنی ئاڵۆزییەکان، کردنەوەی گەرووی هورمز، و چارەسەرکردنی ناکۆکییەکانی تاران لەگەڵ واشنتن و ڕیاڕ.