سبەینێ قەندیل هەنگاوێکی مێژوویی نوێ بۆ پرۆسەی ئاشتی ڕادەگەیەنێت

ئیرادە میدیا

بڕیارە سبەینێ، ٢٦ـی تشرینی یەکەمی ٢٠٢٥، گەریلاکانی هەپەگە، لە کۆنگرەیەکی ڕۆژنامەوانییدا هەنگاوێکی دیکەی مێژوویی و گرنگ بۆ پێشخستنی پرۆسەی ئاشتی و بنیاتنانی کۆمەڵگەیەکی دیموکراتیک بنێن.

لەو بارەیەوە چاوەڕوان دەکرێت ڕاگەیاندراوێکی تایبەت ئاراستەی ڕای گشتیی بکرێت و تیایدا وردەکاریی هەنگاوە نوێیەکە ئاشکرا بکرێت.

ئەم هەنگاوە نوێیە لەکاتێکدایە کە ماوەیەک پێش ئێستا زنجیرەیەک هەنگاوی کردەیی لەسەر بنەمای بانگەوازە مێژووییەکەی عەبدولا ئۆجەلان، ڕێبەری کورد و پەکەکە، دەستیپێکرد.

٢٧ـی شوباتی ٢٠٢٥: ئۆجەلان بانگەوازی مێژوویی "بانگەوازی ئاشتی و کۆمەڵگەی دیموکراتیک"ی بڵاوکردەوە، کە وەک نەخشەڕێگایەک بۆ قۆناغی نوێ سەیر دەکرێت.

٥ تا ٧ـی ئایار (٢٠٢٥): لە چوارچێوەی ئەو بانگەوازەدا، پارتی کرێکارانی کوردستان (پەکەکە) کۆنگرەی ١٢ـیەمینی خۆی بەست و چەندین بڕیاری گرنگی بۆ ڕەخساندنی زەمینەی ئاشتی پەسەند کرد.

١١ـی تەممووز (٢٠٢٥): وەک نیشاندانی نیازپاکی، گرووپێکی ٣٠ کەسی گەریلا بە سەرپەرشتی بەسێ هۆزات و بەهزاد چارچەل، لە مەراسیمێکی سیمبولیکدا لە ئەشکەوتی جاسەنەی سنووری سلێمانی، چەکەکانیان سووتاند.

چاوەڕوان دەکرێت بڕیار و هەنگاوەکەی سبەینێی گەریلاکان درێژەپێدەری ئەو زنجیرە هەوڵانە بێت و کاریگەریی ڕاستەوخۆی لەسەر گەشەپێدانی زیاتری پرۆسەی چارەسەری هەبێت.