زانیاری نوێ لەبارەی ڕێککەوتن لەسەر داهاتی نانەوتیی ڕاگه‌یه‌نرا

سەرۆكی فەرمانگەی هەماهەنگی‌و بەدواداچوونی هەرێمی ڕایگەیاند، گفتوگۆکانی نێوان هەولێرو بەغدا لەبارەی داهاتی نانەوتی هەرێم بەردەوامن، بەڵام بۆچوونەکان جیاوازن.

عه‌بدولحه‌كیم خه‌سرەو سەرۆكی فەرمانگەی هەماهەنگی‌و بەدواداچوونی حکومەتی کاربەڕێکەری هەرێم ڕایگەیاند، "گفتوگۆکانی نێوان هەولێرو بەغدا لەبارەی داهاتی نانەوتی هەرێم بەردەوامن، بەڵام هەردوولا لەوبارەیەوە بیروبۆچوونی جیاوازیان هەیە".

ئاشکراشیکرد، "سەرباری بیروبۆچوونی جیاوازمان لەبارەی داهاتی نانەوتی لەگەڵ بەغدا، بەڵام تا ئەو پرسە یەکلا دەبێتەوە مانگانە لەسەر بڕە پارەیەک ڕێککەوتوون بۆمان بنێرن".

سەرۆكی فەرمانگەی هەماهەنگی‌و بەدواداچوونی هەرێم ئاماژەی به‌وه‌شكردووه‌، هەرێم هەموو پابەندییەكانی خۆی جێبەجێكردووە، پێویستە بەغداش بودجەو شایستە داراییەكان بنێرێت.

ئەوەیش لەکاتێکدایە، یەکشەممە 12ی تشرینی یەکەمی 2025، ڕێباز حەملان ڕایگەیاندووە، دانوستانەکان لەبارەی داهاتی نانەوتی هەرێم نەوەستاوەو بەردەوامی هەیە، سودانی وەک خۆی ئاماژەی پێدابوو، لەڕێگەی ئەو لیژنەیەی کە پێکیهێنابوو هەوڵی یەکلاکردنەوەی پرسەکە دەدات، بەڵام هێشتا لەبارەی داهاتی نانەوتی نەگەیشتوونەتە ڕێککەوتن.