دابەشکردنی نەوتی ماڵان لە سلێمانی و هەڵەبجە دەستیپێکرد

ئیرادە میدیا

پرۆسەی دابەشکردنی نەوتی ماڵان بە نرخی پاڵپشتیکراوی حکومەتی هەرێمی کوردستان دەستیپێکرد.

لەم قۆناغەدا، ناوچە شاخاوییەکان کراونەتە ئەولەویەت. کارزان رەئووف، بەڕێوەبەری نەوت و کانزاکانی دهۆک، رایگەیاند: تا ئێستا 8,000 خێزان لە سنوورەکەیان نەوتیان پێدراوە و پرۆسەکە بەردەوامە.

لەلایەکی دیکەوە، لە پارێزگای سلێمانی و هەڵەبجە، دابەشکردن دەستیپێکردووە. هێمن ئیبراهیم، قایمقامی قەزای پێنجوێن، ئەمڕۆ شەممە ڕایگەیاند: دابەشکردنمان بەردەوامە و زۆرینەی خەڵکی شارەکەمان نەوتی وەرگرتووە. دابەشکردن لە تەوێڵە و بیارە لە دەڤەری هەورامان و بەشێک لە هەڵەبجە دەستیپێکردووە و ئیدارە سەربەخۆکانی گەرمیان و راپەڕینیش گەیشتوونەتە بەشە نەوتی خۆیان و لە هەندێکیان دابەشکردن دەستیپێکردووە.

نرخی فرۆشتنی نەوتی پاڵپشتیکراو لە سەنتەری شارەکان 104 هەزار دینار و لە گوندەکان 105 هەزار دینارە بۆ بەرمیلێک. ئەمە لە کاتێکدایە کە نرخی نەوتی بازرگانی بۆ ماڵان بە کرێی گواستنەوە و قازانجی فرۆشیارەکانەوە نزیکەی 180 هەزار دینار بۆ هەر بەرمیلێک دەفرۆشرێت.

هەرێمی کوردستان بۆ دابەشکردنی نەوت بەسەر سێ زۆندا دابەشکراوە کە کۆی گشتی نزیکەی 1.3 ملیۆن خێزان دەگرێتەوە.