کۆچبەرە کوردەکانی لیبیا، بەرەو هەرێمی کوردستان بەڕێکەوتن

ئیرادە میدیا

ئەو 40 هاوڵاتییە کوردەی کە زیاتر لە دوو مانگە لە لیبیا گیریانخواردووە، ئەمڕۆ شەممە گەشتەکەیان بەرەو هەرێمی کوردستان دەستپێکرد. کۆچبەرەکان، کە زۆرینەیان دانیشتووی ئیدارەی سەربەخۆی ڕاپەڕینن لە پارێزگای سلێمانین، بە هەماهەنگی نێوان باڵیۆزخانەی عێراق لە لیبیا و حکومەتی هەرێمی کوردستان دەگەڕێندرێنەوە.

ئەحمەد سەحاف، هەڵسووڕێنەری کاروباری باڵیۆزخانەی عێراق لە لیبیا، ئەمڕۆ شەممە ڕاگەیاند: کۆچبەرەکان لە لیبیاوە بەرەو تورکیا بەڕێکەوتوون و لەوێشەوە بۆ هەولێر دەگەڕێنەوە.

محەممەد عەبدولڕەحمان، باوکی یەکێک لە کۆچبەرەکان، ڕاگەیاند: کوڕەکەی وتویەتی، کاتژمێر 02:00ی بەرەبەیانی سبەی یەکشەممە لە تورکیاوە بەڕێدەکەون و بڕیارە کاتژمێر 04:15 بگەنەوە فڕۆکەخانەی نێودەوڵەتیی هەولێر.

سەحاف ئاماژەی بەوەشدا، کار بۆ گەڕاندنەوەی 35 کۆچبەری دیکەی کوردیش دەکرێت کە لە لیبیا دۆزراونەتەوە و دڵنیاییدا کە هەوڵەکان بۆ گەڕانەوەی هەموو هاونیشتمانیانی گیرخواردوو بەردەوام دەبێت.