چەکدارانی دیمەشق دیسان هێرشیان کردەەوە سەر هەسەدە

ئیرادە میدیا

هێزەکانی سووریای دیموکرات (هەسەدە) ڕایگەیاند، جارێکی دیکە گروپەکانی سەر بە حکومەتی دیمەشق لە ناوچەکانی ڕۆژهەڵاتی دێرەزۆر هێرشیان کردووەتە سەر پێگەیەکی سەربازیی هێزەکانیان، کە لە ئەنجامدا ئەندامێکی هەسەدە بە سەختی بریندار بووە.

هەسەدە لە ڕاگەیەندراوێکی فەرمیدا ئاماژەی بەوەدا کە لە پێشێلکارییەکی نوێدا، گروپە چەکدارەکانی سەر بە دیمەشق بە شێوەیەکی ڕاستەوخۆ پێگەیەکی هێزەکانیان لە شارۆچکەی غەرانیج لە ڕۆژهەڵاتی دێرەزۆر کردووەتە ئامانج.

بەپێی ڕاگەیەندراوەکە، هێرشەکە لە کەناری ڕۆژئاوای ڕووباری فوڕاتەوە دەستیپێکردووە، ئەو شوێنەی کە گرووپە چەکدارەکانی سەر بە دیمەشق تیایدا جێگیرن.

لە ئەنجامی بۆردوومان و هێرشەکەدا، یەکێک لە ئەندامانی هێزەکانی سوریای دیموکرات (هەسەدە) بە سەختی بریندار بووە و دەستبەجێ گوازراوەتەوە بۆ نەخۆشخانە بۆ وەرگرتنی چارەسەری پێویست.

ئەم هێرشە لە کاتێکدایە کە سەرەڕای بوونی ئاگربەستێکی ڕاگەیەنراو لە نێوان هەسەدە و حکومەتی دیمەشق و هەوڵەکان بۆ گەیشتن بە ڕێککەوتنێکی هەمیشەیی، بەڵام ناو بەناو پێکدادانی چەکداری لە نێوان هەردوولا ڕوودەدات.