سبه‌ینێ خولی دووه‌می هه‌ڵبژاردنی سه‌رۆكایه‌تی له‌ ئێران به‌ڕێوه‌ده‌چێت

ناوەندی هەواڵ

یه‌ك ڕۆژماوە بۆ ئه‌نجامدانی خولی دووه‌می هه‌ڵبژاردنی سه‌رۆكایه‌تی ئێران و ده‌سته‌ی هه‌ڵبژاردنه‌كانی ئێرانیش داوا له‌ لایه‌نگرانی دووكاندیده‌كه‌ ده‌كات ئارامیی خۆیان بپارێزن.

بانگه‌شه‌ی هه‌ڵبژاردن له‌ سه‌رتاسه‌ری ئێران كۆتایی پێهات، و هه‌ریه‌ك له‌ مه‌سعود پزیشكیان و سه‌عید جه‌لیلی سه‌ردانی شاری كرماشان و سنه‌ی ڕۆژهه‌ڵاتی كوردستانیان كرد و له‌ نێو ئاپۆڕای لایه‌نگرانیاندا دواساته‌كانی بانگه‌شان به‌ڕێوه‌ برد.

شه‌وی ڕابردووش كۆتا لێدوان و په‌یامی هه‌ردوو كاندیده‌كه‌ كه‌ جه‌لیلی به‌شێوه‌یه‌كی فه‌رمی و پزیشكیانیش له‌ ناو ئۆتۆمبێله‌وه‌ تۆماریان كردبوو له‌ ته‌له‌فزیۆنی فه‌رمی وڵاته‌كه‌وه‌ په‌خش كرا.

هاوكات ده‌سته‌ی هه‌ڵبژاردنه‌كانی سه‌ر به‌ وه‌زراتی ناوخۆی ئێران ڕایگه‌یاندووە، كاتی بانگه‌شه‌ له‌ كاتژمێر(08:00) سه‌رله‌به‌یانیی ڕۆژی پێنج شه‌ممه‌وه‌ كۆتایی هات و داواشی له‌ لایه‌نگرانی هه‌ردوو كاندیده‌كه‌ كرد له‌ كۆتا ساته‌كاندا ئارامیی خۆیان بپارێزن.

هاوکات، عه‌لی خامنه‌یی ڕێبه‌ری باڵای ئێران  جه‌ختی له‌ گرنگی ئه‌م خوله‌ی هه‌ڵبژاردنی ئێران کردووەتەوەو ڕایگه‌یاندووە: تێڕوانینی به‌ دوژمندانانی ئه‌و كه‌سانه‌ی كه‌ له‌ خولی یه‌كه‌مدا ده‌نگیان نه‌داوه‌، "به‌ته‌واوی هه‌ڵه‌یه‌" و دەشڵێت: تا ڕێژه‌ی ده‌نگدان زیاتر بێت توانای وڵاته‌كه‌ بۆ گه‌یشتن به‌ ئامانجه‌كانی زیاتر ده‌بێت.

 هه‌ینی ڕابردوو خولی یه‌كه‌می چوارده‌هه‌مین هه‌ڵبژاردنی سه‌رۆكایه‌تی له‌ ئێران به‌ڕێوه‌ چوو بەڵام به‌هۆی نه‌هێنانی ده‌نگی پێویسته‌وه‌  هه‌ریه‌ك له‌ سه‌عید جه‌لیلی و مه‌سعود پزیشكیان كه‌وتنه‌ خولی دووه‌مه‌وه‌، كه‌ بڕیاره‌ ڕۆژی هه‌ینی 5غ ته‌مموز به‌ڕێوه‌ بچێت.