ژمارەی قوربانیانی غەززە گەیشتە نزیكەی 38 هەزار كەس

ناوەندی هەواڵ

تەندروستی غه‌ززه‌ بڵاویکردەوە، له‌ سه‌ره‌تای هێرشه‌كانی ئیسرائیل‌ بۆ سه‌ر كه‌رتی غه‌ززه‌ 37 هه‌زار و 925 كه‌س گیانیان لەدەستداوە.

ئەشرەف قودرە وتەبێژی وەزارەتی تەندروستی فەڵەستین ئه‌مڕۆ سێشەممە 2ی تەمووزی 2024 نوێترین ئاماری جه‌نگه‌كه‌ی بڵاوكرده‌وه‌ و ده‌ڵێت، له‌ 7ی (تشرینی یه‌كه‌م/10)ی 2023وه‌ تائێستا ئیسرائیل به‌ به‌رده‌وامی بۆردومانی ناوچه‌كانی نیشته‌جێبون و شوێنە گشتییەکان و ژێرخانی كه‌رتی غه‌ززه‌ ده‌كات و تائێستا 37 هه‌زار و 925 كه‌س گیانیان لەدەستداوە.

ئەوەشی خستەڕوو، لە ماوەی 24 كاتژمێری ڕابردوو ئیسرائیل 3 كۆمەڵكوژی دیكەی لە غەززە ئەنجامدا لە ئاكامدا 25 كەسی دیكە  گیانیان لەدەستداوە.

بەگوێرەی ئامارەکانی وەزارەتی تەندروستی فەڵەستین هه‌ر به‌هۆی هێرشه‌كانی ئیسرائیل‌ كه‌ له‌ ڕێگه‌ی ئاسمانی، وشكانی و هێرشی زه‌مینییه‌وه‌ ئه‌نجامی ده‌دات 87 هه‌زار و 141 كەس برینداربوون.