ئیسرائیل: ڕێگەنادەین سکرتێری گشتی نەتەوەیەکگرتوەکان سەردانی وڵاتەکەمان بکات

ناوەندی هەواڵ

دوای ئەوەی سکرتێری گشتی نەتەوەیەکگرتوەکان داوای هێورکردنەوەی گرژییەکانی ڕۆژهەڵاتی ناوەڕاستی کرد، ئیسرائیل بڕیاریدا چیتر ڕێگە نەدات سکرتێری گشتی نەتەوەیەکگرتوەکان، سەردانی وڵاتەکەی بکات.

لە ڕاگەیەنراوێکدا وەزارەتی دەرەوەی ئیسرائیل بڵاویکردەوە، ئەنتۆنیۆ گۆتێرێس سکرتێری گشـتی نەتەوەیەکگرتوەکان، وەک کەسێکی نەخوازراو ناسێنراوە ئەویش بەهۆی هەڵوێستەکانی لەسەر گرژییەکانی ڕۆژهەڵاتی ناوەڕاست، بڕیاردراوە چونی گۆتێرێس بۆ ناو خاکی ئیسرائیل قەدەغەبکرێت.

جەختیش لەوەکراوەتەوە، زۆرێک لە وڵاتانی جیهان هێرشە موشەکییەکەی ئێران-ـیان بۆسەر ئیسرائیل ئیدانەکرد، ئەگەر کەسێک هەبێت نایەوێت ئیدانەی ئەو هێرشە بکات ئەوا چونی بۆ ئیسرائیل لێ قەدەغە دەکەن.

دوای ئەوەی ئێران لەڕێگەی ژمارەیەک موشەکەوە هێرشی کردەسەر ئیسرائیل، ئەنتۆنیۆ گۆتێریس سکرتێری گشتی نەتەوەیەکگرتوەکان، ئیدانەی گرژییەکانی نێوان ئەو دوو وڵاتەی کرد و داوایکرد بەپەلە گرژییەکانی ڕۆژهەڵاتی ناوەڕاست هێوربکرێنەوە و ئاگربەست ڕابگەیەنرێت.