ئیسرائیل ماڵی کوڕی سەرکردەیەکی دیاری فەلەستینی بە ئامانج گرت

ناوەندی هەواڵ

ئاژانسی هەواڵی ڕۆیتەرز لە زاری دوو لێپرسراوی باڵای ئەمنی فەلەستین بڵاویکردەوە، بەرەبەیانی ئەمڕۆ ئیسرائیل کەمپی پەنابەرانی فەلەستینی لە باشووری لوبنان بۆردومانکردووە و مونیر مەقدەح، فەرماندەی باڵی لوبنانی کەتائیبی شوهەدای ئەقسا باڵی سەربازی بزوتنەوەی فەتحی فەلەستینی کردووەتەئامانج.

بەگوێرەی زانیارییەکانی ڕۆیتەرز، تا ئێستا چارەنووسی مونیر مەقدەح نادیارە، سەرچاوەکان دەڵێن ئیسرائیل لەو بۆردومانەدا باڵەخانەیەکی لە کەمپی عەین حلوەی پەنابەرانی فەلەستین لە باشووری لوبنان کردووەتەئامانج.

لەلایەکی دیکەوە بەرپرسێکی کەمپەکە بە ئاژانسی فرانس پرێسی وتووە، لەو بۆردومانەکەدا ماڵی کوڕەکەی مونیر مەقدەح کراوەتەئامانج، ئەویش دەڵێت تا ئێستا دیار نییە مونیر مەقدەح ماوە یان گیانی لەدەستداوە.

بۆ یەکەمجارە کەمپی عەین حلوە کە گەورەترین کامپی پەنابەرانی فەلەستینە لە لوبنان لەماوەی ئەمساڵدا لەلایەن ئیسرائیلەوە بۆردومان بکرێت.