پاپای نوێی ڤاتیكان هەڵدەبژێردرێت

بڕیارە ئەمڕۆ پرۆسەی هەڵبژاردنی پاپایەكی نوێ لە ڤاتیكان بەڕێوەبچێت، كە پێنج كاردیناڵ كاندیدن بۆ ئەو پۆستە،  بەڕێوەچونى ئەو پرۆسەیەش دوای زیاتر لە دوو هەفتە لە گیانلەدەستدانی پاپا فرانسیس دێت.

لە 21ى مانگى رابردوو پاپا فرانسیسی ڤاتیكان لە تەمەنی 88 ساڵیدا گیانی لەدەستدا.

بەپێى زانیارى میدیا جیهانیەکان، ئەمڕۆ ڤاتیكان پاپایەكی نوێ هەڵدەبژێرێت، لە پرۆسەكەدا 135 كاردیناڵ دەنگ دەدەن بۆ هەڵبژاردنی پاپا، بەپێی یاساكانی ڤاتیكان، ئەو كاردیناڵانەی لە ڕۆژی دەنگداندا ئامادە دەبن، لە كڵێسای سیستین دەبن و ناتوانن دەستیان بە مۆبایل و جیهانی دەرەوە بگات.

لە زانیارییەکاندا هاتووە، كێبڕكێكەش لە نێوان پێنج كاردیناڵدایە، كە ڕكابەری دەكەن بۆ شوێنگرتنەوەی پاپا فرانسیس و بوون بە پاپای ڤاتیكان، هەروەها كاردیناڵێكی عێراقیش خۆی كاندیدكردووە بۆ ئەوەی ببێت بە پاپای ڤاتیكان

لەو كاتەدا كاردیناڵەكان چەندین كۆبوونەوە دەكەن و لە بەیانیدا دوو جار دەنگ دەدەن و دوای نیوەڕۆش دوو جاری دیكە دەنگ دەدەن، هەر كاتێكیش پاپای نوێ هەڵبژێردرا، بە دووكەڵێكی سپی، كە لە دووكەڵكێشی كڵێسای سیستینەوە دێتە دەرەوە، جیهان لە هەڵبژاردنی پاپای نوێ ئاگادار دەكرێتەوە.