نه‌ته‌وه‌یه‌كگرتووه‌كان: بۆ گه‌ڕاندنه‌وه‌ى پاره‌ به‌ تاڵانبراوه‌كانى پشتیوانى عێراق ده‌كه‌ین

هاوکاری هەوڵەکانی عێراق دەبین بۆ بونیادنانی وڵاتێکی دوور لە گەندەڵیی

ناوەندی هەواڵ

بەرنامەی گەشەپێدانی نەتەوە یەکگرتووەکان لە عێراق ئاشكرایكرد بۆ گەڕانەوەی پارە بەتاڵانبراوەکان و ڕووبەڕووبوونەوەی گەندەڵی، پشتیوانی لە عێراق دەکەن.

 بەوتەی بەرهەم ساڵح، سەرۆککۆماری پێشووی عێراق،  لەدوای ساڵی 2003ەوە عێراق ملیاران دۆلاری لە داهاتی نەوت دەستکەووتوە، لەو بڕەش نزیکەی 150 ملیار دۆلار بەگەندەڵی براوەتە دەرەوەی عێراق.

ئاوکی لوتسما، نوێنەری بەرنامەی گەشەپێدانی نەتەوە یەکگرتووەکان لە عێراق بە ڕۆژنامەی سەباحی نیمچە فەرمی ڕاگەیاندووە: پشتیووانی لێکۆڵینەوەی بنکۆڵکاری تایبەت بە دزینی پارەی عێراق و بردنی بۆ دەرەوە دەکەین، بە ئامانجی ئەوەی حکومەتیش بەدواداچوونی بۆ بکات و بۆ وڵات بگەڕێنرێتەوە.
وتیشى: چاودێری هەوڵەکانی تایبەت بە گەڕانەوەی پارە بەتاڵانبراوەکانی عێراق لەڕێگای دادگای مەدەنیی و بەسزاگەیاندنی تاوانبارانی دۆسییەکانی گەندەڵی دەکەین، سەرکەوتنی ئەم هەوڵەش پێویستی بە هەماهەنگی نێودەوڵەتیی هەیە.

"هاوکاری حکومەتی عێراق دەکەین تا بتوانێت ئەو پارانە بگەڕێنێتەوە کە لە وڵاتانی دیکە سڕکراون و بڕیاری دادگا لەبارەیانەوە پلەی کۆتاییان وەرگرتووە، هاوکات لەبوارەکانی ئاڵوگۆڕی زانیاری لەسەر مامەڵەی گوماناوی بانکی و سڕکردنی ئەو پارانەی گومانیان لەسەرە پشتیوانی بەغدا دەبین". ئاوكى لوتسما وا ده‌ڵێت.
 
ده‌شڵێت:"هاوکاری هەوڵەکانی عێراق دەبین بۆ بونیادنانی وڵاتێکی دوور لە گەندەڵیی، تا بەهۆیەوە هەموو هاووڵاتیان بتوانن بەشێوەیەکی یەکسان و دادپەروەرانە بە مافەکانیان بگەن".