شادمان مه‌لا حه‌سه‌ن: حه‌شدى شه‌عبى له‌هێرشكردنه‌سه‌ر لاله‌زار به‌شداربوه‌

ناوەندی هەواڵ

به‌پێى ئه‌و زانیاریانه‌ى سه‌ركرده‌یه‌كى به‌ره‌ى گه‌ل ئاشكرایكردوه‌، حه‌شدى شه‌عبى له‌هێرشكردنه‌سه‌ر لاله‌زار به‌شداریكردوه‌، ده‌شڵێت:"حکومەتى عێراق بەر لەهێرشه‌كه‌ زانیاریى هه‌بوو، ده‌یتوانیى ڕێگریی لێبکات، بەڵام هیچ هەڵوێستی نەبوو".

شادومان مەلا حەسەن سەرکردەى بەرەی گەلى لاهور شێخ جه‌نگى له‌چاوپێكه‌وتنێكدا له‌گه‌ڵ میدیاى پارتى ئاشكرایكرد، "حەشدی شەعبی له‌گه‌ڵ هێزه‌ ئه‌منیه‌كانى سلێمانى، لەهێرشکردنەسەر لالەزار بەشداریكردوه‌".

وتیشى:"بەرەی گەل حزبێکی مۆڵەتپێدراوو یاساییە، هەروەها لەپرۆسەی سیاسی بەردەوامدەبێت‌و لاهور شێخ جەنگیش وەک ڕەمزێکی حزبەکە دەمێنێتەوە".

سه‌ركرده‌كه‌ى به‌ره‌ى گه‌ل ڕه‌خنه‌ى توندى له‌حكومه‌تى عێراق گرت‌و ڕایگه‌یاند، "ئێمه‌ هیچ ئومێدێكمان به‌كاره‌كانى ئه‌و لیژنەیه‌ نییه‌ كه‌ حکومەتی عێراق لەبارەی ڕوداوەکەی لالەزاره‌وه‌ پێكیهێناوه‌، چونكه‌ حکومەتى عێراق بەرلەوەی ئەو پێکدادانە ڕوبدات ئاگادارکرابوەوە کە ڕێگریی بکات، بەڵام هیچ هەڵوێستی نەبوو".

ئه‌وه‌شى وت:"داواده‌كه‌ین لاهور شێخ جەنگی لەسلێمانی دادگایی نەکرێت‌و لەهەر شوێنێک جگە لەسلێمانی دادگایی بکرێت، به‌لاى ئێمه‌وه‌ ئاساییە".

جه‌ختیشیكرده‌وه‌، "بەبێئەوەی لاهور شێخ جەنگی پێشوەختە ئاگاداربکرێتەوە کە فەرمانی دەستگیرکردنی هەیە، هێزێکی زۆر بۆ سەر شوێنی نیشتەجێبونەکەی نێردراوه‌، هێزەکەش چەکی قورس‌و درۆنی بۆمبڕێژکراو پێبوو، به‌گوێره‌ى زانیارییه‌كانى ئێمه‌، یه‌كێتیى سەروو 50 ملیۆن دۆلاری بۆ هێرشەکەی سەر لالەزار خەرجکردوه‌، ئەوەی ئەو هێزە کردی، حزبی بەعسیش لەساڵی هەشتاکان هەر ئەوەندەیکرد".

به‌ره‌به‌یانى ڕۆژى هه‌ینى، هێزێکی زۆری یەکێتیی کە پێکهاتبون لە(کۆماندۆ، ئاسایش‌و دژەتیرۆر) بەرەو لالەزار شوێنی نیشتەجێبونی لاهور شێخ جەنگی جوڵەیان پێکراو چواردەوری شوێنەکەیان گەمارۆدا، دواتر شەڕو پێکدادان لەنێوان هێزەکانی یەکێتیی‌و هێزی دوپشکی سەر بەلاهور شێخ جەنگی ڕویدا، دوای ڕوبەڕوبونەوەیەکی توندی سێ كاتژمێریى، سه‌ره‌نجام سێ ئەندامی هێزەکانی یەکێتیی کوژران‌و 19ی دیکەش برینداربون، هەروەها لاهور شێخ جەنگی‌و پۆڵادی براشی دەستگیرکران.