تەیف سامى توڕەیە لە پرسى ناردنى موچەى هەرێم

پاش ئەوەى دواهەمین شاندى هەرێم لە كۆبونەوەكانى دا لەگەڵ وەزیرانى "دارایى و نەوت و ئاوەدانكردنەوە"ى عێراق؛ لە گفتوگۆیەكى چڕدا لەسەر زۆرێك لە پرسەكانى پەیوەست به موچەى فەرمانبەرانى هەرێم گەیشتنە رێككەوتن، بەڵام تا ئێستا و بەپێى زانیارییەكانى ئیرادە لەسەر داهاتى نانەوتى هیچ جۆرە رێككەوتنێك نەكراوە.

بڕیاروایە ئەمڕۆ سێشەممە، لە بەغدا كۆبونەوەى ئەنجومەنى وەزیرانى حكومەتى ناوەندى بەڕێوەبچێت و لەو كۆبونەوەیەدا بڕیار لەسەر ناردنى موچەى فەرمانبەرانى هەرێمى كوردستان بدرێت.

بەگوێرەى زانیارییەكانى ئیرادە كە لەسەرچاوەى متمانەپێكراوى وەزارەتى دارایى عێراقەوە بەدەستیگەیشتوە، پاش ئەوەى تەیف سامى وەزیرى وەزارەتى ناوبراو؛ راپۆرتى كۆبونەوەكانى لەگەڵ دواهەمین شاندى هەرێمى بۆ ئەنجومەنى وەزیرانى بەغدا بەرزكردۆتەوە، توڕە بوەو بێزاریى خۆى لەپرسى موچەى فەرمانبەرانى هەرێم دەربڕیوەو وتویەتى: ئێمە بە هیچ جۆرێك لەسەر داهاتى نانەوتیى هەرێم نەگەیشتوین بە رێككەوتن، لەبەرئەوە با محەممەد شەییاع سودانى سەرۆكوەزیران خۆى بڕیار لەسەر ناردنى موچەى فەرمانبەرانى هەرێم بدات.

ئیرادە زانیویەتى ئەو راپۆرتەى بۆ ئەنجومەنى وەزیران بەرزكراوەتەوە، ئیمزاى هەریەك لە تەیف سامى و نوێنەرى رێپێدراوى شاندەكەى هەرێمى بەسەرەوەیەو لەرێى هامشێكەوە نوسیویەتى: لەسەر هەمو خاڵەكان كۆكین بێجگە لە داهاتى نانەوتى یاخود پشكى حكومەتى فیدراڵیى، ئەمەش بۆتە هۆى ئەوەى نەگەینە هیچ رێككەوتنێك، لەبەرئەوە تكایە خۆتان بڕیار بدەن.

جێى ئاماژەیە، هەفتەى رابردو حكومەتى بەغدا بە سێ مەرج بڕیارى ناردنى موچەى فەرمانبەرانى هەرێمى دا، ئەگەرچى تا ئێستا دوان لە مەرجەكان جێبەجێكراوە، بەڵام مەرجى سێهەم كە داهاتى نانەوتییە كێشەى لەسەرە، لەبەرئەوە؛ چاوەڕوان دەكرێت ئەمڕۆ لە كۆبونەوەكەى ئەنجومەنى وەزیرانى حكومەتى فیدراڵیى بە بەڵێ یان نەخێر وەڵامى پرسى ناردنى موچەى فەرمانبەرانى هەرێم بدرێتەوە.