حكومەت پێكنایەت و پەیوەندییەكانى یەكێتى و پارتيش سڕ دەبن

پاش ئەوەى مەحمود محەمەد، وتەبێژی پارتی لە كۆنگرەیەكى رۆژنامەوانیى دا كە زۆرێك لە میدیا ناوخۆییەكانى هەرێم ئامادەى بون، ئەوەى خستەڕو كە چاوەڕوان دەكرێت لە مانگی داهاتودا دەستەی سەرۆكایەتی پەرلەمانی كوردستان هەڵبژێردرێت، بەڵام ئەگەرەكان بەو ئاراستەیە دەڕۆن كه نە پەرلەمان ئەكتیڤ دەبێتەوەو نە كابینەى نوێى حكومەتى هەرێم پێكدێت.

سەبارەت بە لێدوانێكى ترى ناوبراو لەو كۆنگرە رۆژنامەوانییەدا كە وتبوى: پرسی دابەشكردنی پۆستەكانی حكومەت لەنێوان پارتی و یەكێتی تاڕادەیەكی زۆر یەكلایی بۆتەوە، بۆ ئەمەشیان و بەپێى زانیارییەكانى ئیرادە، هەمو جۆرە گفتوگۆو لێدوانێك لەسەر ئەو پرسە راگیراوەو یەكێتى بەهۆى روداوەكانى ئەم دواییەى سلێمانى؛ لە پارتى نیگەرانەو دەنگۆى ئەوەش هەیە سەرجەم پەیوەندییەكانى ئەو حزبە لەگەڵ پارتى تا كاتێكى نادیار هەڵپەسێردرێت.

هاوكات ئیرادە ئەوەشى زانیوە، كاتێك مەحمود محەمەد، وتەبێژی پارتی دەڵێت: هەردو وەفدى یەكێتى و پارتى بۆ پێكهێنانى حكومەت گەیشتونەتە رێككەوتن، ئەو قسەیە تا پێش روداوەكەى ئەم دواییەى سلێمانى كارى پێدەكرا و لە ئێستادا سەرجەم هەوڵەكان بۆ ئەكتیڤكردنەوەى پەرلەمان و دانانى كابینەى نوێ؛ گەڕاونەتەوە خاڵى سفر و لە چەند رۆژى داهاتوشدا كە بڕیاربو وەفدى هەردو حزب كۆببنەوە، كۆبونەوەكە راگیراوەو هیچ هەوڵێكى جیددى بۆ پەرلەمان و حكومەتیش لەئارادا نییە.

جێى ئاماژەیە، نزیكەى ساڵێك پێش ئێستا هەڵبژاردنى پەرلەمانى كوردستان ئەنجامدرا و پەرلەمانتاران تەنها بۆ وەرگرتنى موچە؛ یەكەم دانیشتنیان بۆ سوێندخواردن ئەنجامدا و لەو رۆژەوە بەشێوەیەكى گاڵتەجاڕیى پەرلەمان ئیفلیجەو نە بڕیارێك دەركراوە نە حكومەت پێكهاتوە هاوكات خودى پەرلەمانیش تا ئێستا بێ سەرۆك و جێگر و سكرتێرە.