له‌سلێمانى چى ڕوویداو بۆ هیچ كه‌س نه‌یزانى؟ هه‌سه‌ده‌و حكومه‌ته‌كه‌ى دیمه‌شق له‌سلێمانى كۆبوونه‌وه‌

به‌پێى ئه‌و زانیاریانه‌ى سەرچاوەیه‌ك له‌ئەنجوومەنی ئاسایشی نیشتمانی عێراق ئاشكرایكردووه‌، بەغدا چووەتە ناو هەوڵەکانی نێوەندگیریی لەنێوان حکومەتی سوریاو سەرکردایەتی هێزەکانی سوریای دیموکرات (هه‌سه‌ده‌) بەسەرۆکایەتی کورد، کە ناوچەیەکی فراوانی باکووری ڕۆژهەڵاتی سوریا (ڕۆژئاواى كوردستان)ى له‌ژێر كۆنترۆڵدایه‌، یه‌كه‌م كۆبوونه‌وه‌ش له‌سلێمانى به‌ڕێوه‌چووه‌.

ڕادیۆى مۆنتى كارلۆى فه‌ره‌نسى بڵاویكردووه‌ته‌وه‌، زیاتر لەسێ هەفتە لەمەوبەر محەمەد شیاع سودانی سەرۆک وەزیرانی عێراق سەرکەوتووبوو لەگەیشتن بەڕێککەوتنێکی مێژوویی لەگەڵ حکومەتی هەرێم، بەو مەرجەی حکومەتی ناوەند کۆنترۆڵی داهاتی نەوت لەناوچە کوردستانییەکان بکات.

سودانی هەوڵدەدات سوود لەم سەرکەوتنە وەربگرێت‌و مۆدێلی عێراقی-کورد بگوازێتەوە بۆ گۆڕەپانی سوریا‌و بەباشی دەزانێت کە پرسی نەوت كه‌ یەکێکە لەخاڵە دیارەکانی ململانێی نێوان دیمەشق‌و هێزەکانی سوریای دیموکرات به‌هه‌مانشێوه‌ى هه‌ولێرو به‌غدا چاره‌سه‌ر بكرێت.

ئه‌وه‌ش ڕوونكراوه‌ته‌وه‌، لەماوەی دوو ساڵی ڕابردوودا، بەتایبەتی لەسەرەتای سەرهەڵدانی شەڕ لەغەززە، ڕۆڵی ناوچەیی عێراق لەچارەسەرکردنی ململانێکان بەشێوەیەکی بەرچاو دابەزیوەو تەنانەت ڕەنگە نەمێنێت، هه‌ربۆیه‌ ڕادیۆكه‌ نووسیویه‌تى، "کۆنفرانسی سێیەمی بەغدا بۆ کاتێکی نادیار دواخراوەو سودانیش لەڕێگەی ئەم نێوەندگیرییەوە هەوڵدەدات ئەم ڕۆڵە بگەڕێنێتەوە".

هه‌روه‌ك باسى ڕاستەوخۆترین هۆکار بۆ ئه‌و نێوه‌ندگیرییه‌ كراوه‌و ئاماژه‌ به‌وه‌كراوه‌، ڕێککەوتنی عێراق‌و تورکیا كه‌ نزیکەی هەفتەیەک لەمەوبەر ڕاگەیەندرا ئاماژه‌ى به‌وه‌كردووه‌، ده‌بێت ڕۆڵیان هه‌بێت له‌چارەسەرکردنی کێشە ناوچەییەکاندا، بۆ ئه‌وه‌ش، سودانى هه‌وڵده‌دات ئه‌وه‌ بگۆڕێت بۆ نێوەندگیریی لەنێوان دیمەشق‌و هه‌سه‌ده‌.

بەپێی زانیارییەکان، ڕاوێژکاری ئاسایشی نیشتمانی‌و دەزگای هەواڵگری عێراق ئەم نێوەندگیرییە بەڕێوەدەبەن، سه‌رچاوه ئاگاداره‌کان له‌به‌غدا ڕایانگه‌یاندووه‌، له‌ناوه ڕاستی هه‌فته‌ی ڕابردوودا گفتوگۆ له‌نێوان لایه‌نی عێراقی‌و سه‌رکردایه‌تی هێزه‌کانی هه‌سه‌ده‌ له‌سلێمانی کراوه.

دوابەدوای ئەوە دیدارێکی دیکە بەڕێوەچووه‌ کە نوێنەرانی لایەنی عێراقی‌و شاندێکی وەزارەتی بەرگریی‌و هەواڵگریی سووریاو سەرکردەکانی هه‌سه‌ده‌ى لەخۆگرتبوو، نێوەندگیرییەکە تیشکیخستووه‌ته‌سەر دوو پرسی سەرەکی.

هه‌روه‌ك له‌درێژه‌ى ئه‌و دوو باسه‌دا دوو پرسه‌كه‌ ڕوونكراونه‌ته‌وه‌و ئاماژه‌ به‌وه‌كراوه‌، یه‌كه‌میان، "تێکەڵکردنی هه‌سه‌ده‌یه‌ له‌گه‌ڵ سوپای نوێی سوریا، بەسوودوەرگرتن لەئەزموونی پێشووی عێراق لەتێکەڵکردنی هێزە کوردییەکان بۆ ناو سوپای عێراق‌و دووه‌میش، گەیشتن بەڕێککەوتنێکی نەوتیی لەنێوان دیمەشق‌و هێزەکانی سوریای دیموکرات‌و ڕێگەدان بەڕادەستکردنی دامەزراوە نەوتییەکانی باکوری ڕۆژهەڵاتی سوریا، کە ئێستا لەژێر دەسەڵاتی هێزەکانی سوریای دیموکراتدایە بەحکومەتی سوریا، بابەتێکی ئەوپەڕی گرنگە بۆ دیمەشق".

باس له‌وه‌شكراوه‌، قەناعەتێک لێرە لەبەغدا لەنێوان سەرۆک وەزیرانی عێراق‌و دەزگای هەواڵگریی‌و ڕاوێژکاری ئاسایشی نیشتمانی عێراق‌و وەزارەتی دەرەوەدا گەشە دەکات کە سوریایەکی سەقامگیر زۆر سوودبەخشەو خزمەت بەبەرژەوەندییەکانی عێراقیش دەکات، هاوكات سوریایەکی ناسەقامگیرو سەرهەڵدانی ململانێی چەکداریی لەنێوان دیمەشق‌و هه‌سه‌ده‌، دەبێتە هۆی دابەشبوونی مەترسیدار، بەدڵنیاییەوە ئه‌وكاتیش له‌سودى كه‌س نابێت‌و عێراقیش هەوڵدەدات ئەو سیناریۆیە دووربخاته‌وه‌و ڕوو نه‌دات.

جه‌خت له‌وه‌شكراوه‌ته‌وه‌، "هەر یەکلاکردنەوەیەکی سەرکەوتوو لەنێوان دیمەشق‌و هه‌سه‌ده‌، دەتوانێت دەرگا بۆ کۆتاییهاتنی هەمیشەیی بوونی سەربازیی ئەمریکا لەسوریاو عێراق بکاتەوە، کە ئامانجێکی ستراتیژیی گرنگە بۆ بەغداو بۆ دیمه‌شقیش".