حكومه‌ته‌كه‌ى شه‌رع له‌باره‌ى كورده‌وه‌ دان به‌ڕاستیه‌كدا ده‌نێت

وەزیری دەرەوەی سووریا ڕه‌تیده‌كاته‌وه‌ هه‌ر جۆره‌ دابه‌شكارییه‌ك له‌وڵاته‌كه‌دا قبوڵبكه‌ن، ده‌شڵێت:"خوازیاری هاوکاریی بەپەلەین له‌گه‌ڵ هەسەدە بۆ پاراستنی یەکگرتوویی سووریا"، جه‌خیشده‌كاته‌وه‌، "به‌شدارنه‌بوونى هه‌سه‌ده‌ له‌داموده‌زگا ده‌وڵه‌تییه‌كانى سویادا، كه‌لێن‌و ناكۆكییه‌كان زیاتر ده‌كات".

ئەسعەد شه‌یبانی وەزیری دەرەوەی سوریا به‌كه‌ناڵى فه‌رمى سوریا (الاخباریه)ی وتووه‌، "بەشدارنەبوونی هێزەکانی سووریای دیموکرات (هەسەدە) لەدامودەزگا دەوڵەتییەکاندا، قووڵایی کەلێن‌و ناکۆکییەکان زیاتر دەکات، ئێستاش دەرفەتێکی مێژووییە بۆ باکوورو ڕۆژهەڵاتی سووریا کە ڕۆڵێکی چالاک لەداهاتووی وڵاتدا بگێڕن".

شه‌یبانى وتى، "ئەحمەد شەرع پێداگرە لەزەروڕەتی ڕۆڵگێڕانی هەسەدە لەداهاتووی سووریا، ڕێکنەکەوتن لەگەڵ هەسەدە-ش زیان بەبەرژەوەندیی هاووڵاتیان دەگەیه‌نێت‌و گەڕانەوەی ئاوارەکان بۆ سەر ماڵ‌و زێدیان دوادەخات".

وه‌زیرى ده‌ره‌وه‌ى سوریا ئه‌وه‌شى وتوه‌، "دیمەشق دەوڵەتانی هاوكارو پشتیوانى هەسەدەی ڕازیکردووە کە تاقە ڕێگەی مومکین، ڕێککەوتنی 10ی ئادارى نێوان مه‌زڵوم عه‌بدى‌و ئه‌حمه‌د شه‌رعه‌ بۆ به‌شداریی كورد لەئیدارەی حكومه‌تى سوریا، چونكه‌ هەر جۆرە دابەشکردن یان فیدراڵیزمێک نامومکین‌و جێگه‌ی دانوستان نییە".