هه‌سه‌ده‌ هۆشداریده‌دات‌و ئاماده‌باشى بۆ هه‌ر ئه‌گه‌رێك ڕاگه‌یاند

فه‌رمانده‌یه‌كی باڵای هه‌سه‌ده‌ هۆشداریده‌دات، دانوستان لەگەڵ دیمەشق لەقۆناغێکی هەستیاردایه‌و ئامادەن بۆ هەموو سیناریۆکان، ده‌شڵێت:"هیچ پێشکەوتنێکی بەرجەستەیی به‌دینه‌هاتوه‌".

سیپان حەمۆ ئەندامی فەرماندەیی گشتیی هێزەکانی سوریای دیموكرات (هه‌سه‌ده‌) ڕایگه‌یاند، "تێکەڵبون له‌گه‌ڵ سوپای سوریا بژاردەیەکە بۆ ئەوان، هەروەها دانوستانە بەردەوامەکان لەگەڵ حکومەتی دیمەشق لە قۆناغێکی زۆر هەستیاردایە و هیچ پێشکەوتنێکی بەرجەستەی تێدا نییە، به‌ڵام ده‌ڵێت، "ئاماده‌ین بۆ هه‌مو ئه‌گه‌رێك".

سیپان حەمۆ كه‌ هاوكات ئەندامی لیژنەی دانوستانکاری هه‌سه‌ده‌یه‌ بۆ گفتوگۆ له‌گه‌ڵ حكومه‌تی دیمه‌شق، له‌چاوپێكه‌وتنێكدا له‌گه‌ڵ ئەلمۆنیتەر ڕایگەیاند، "هیچ پێشهاتێکی جددی سەبارەت بەدانوستانەکانی ئێستای نێوان هێزەکانی پاراستنی گەل‌و حکومەت لەئارادانییەو گرنگترین هەنگاویش ڕێککەوتنی 10ی ئازار بوو، هەندێک هه‌سه‌ده‌یان تۆمەتبارکردوە بەوەستان بۆ به‌ده‌ستهێنانی کات، بەڵام ئێمە پابەندین بەڕێککەوتنەکەوە".

ئاماژه‌ی به‌وه‌شكرد، "ئێمە ئامادەکاریی دەکەین بۆ هەموو سیناریۆکان لەسەر زەوی، به‌ڵام پابەندبونی تەواومان بەڕێککەوتنی 10ی ئادار دوپاتکردوه‌تەوە، دەمانەوێت بەكرداری هەنگاوبنێن بەرەو یەکگرتن لەچوارچێوەی سوریا، بەرپرسیارێتی خۆمان لەئەستۆبگرین، بەشداری بکەین لەبەڕێوەبردنی وڵاتدا، ئەمە هەڵبژاردنێکی ستراتیژییە بۆ ئێمەو ئامانجی سەرەکیمانە، بەپێچەوانەی ئەوەی دەوترێت، ئێمە ئەجێندای جوداخوازانەمان نییە، هەوڵی دامەزراندنی دەوڵەتی سەربەخۆش نادەین، هەندێك بەردەوام درۆ لەسەر ئەم بابەتە بڵاودەکەنەوە".

سیپان حەمۆ ڕەخنەی لەهەنگاوە تاکلایەنەکان گرت، حکومەتی کاتی لەدیمەشق بەبێ ڕاوێژکردن لەگەڵ هه‌سه‌ده‌ وتی، "حکومەتی کاتی بەبێ ڕاوێژکردن بەئێمە پێکهێنرا، دەستور بەبێ بەشداریی ئێمە داڕێژرا، هەڵبژاردنی پەرلەمانیش ئەنجامدرا کە تەنها شانۆگەری بوو، دامەزراندن بوو نەک هەڵبژاردن، کەواتە چۆن دەتوانین لەم هەلومەرجەدا باس لەهاوبەشییەکی ڕاستەقینە بکەین؟ ئەوان بەشێوەیەکی تاکلایەنە مامەڵە دەكەن، كەچی تۆمەتبارمان دەکەن بەوەی کە نامانەوێت یەکبگرین".

لەپێشهاتێکی پەیوەندیداردا، ڕۆژنامەی حوریەتی تورکی لەمدواییانەدا بڵاویکردەوە، ئەنكەرە هێشتا هیچ هەنگاوێکی کۆنکرێتی بەئاڕاستەی یەکخستنی هێزە کوردییەکانی سەر بەهێزەکانی هه‌سه‌ده‌ لەپێکهاتەکانی حکومەتی ئینتقالی سوریادا نەبینیوە.

ئه‌وه‌شیخسته‌ڕوو، به‌گوێره‌ى ئەو ڕێککەوتنەی کە لە 10ی ئاداری ئه‌مساڵ له‌نێوان ئه‌حمه‌د شه‌رع، سه‌رۆكی سوریا و مه‌زڵوم كۆبانێ، فه‌رمانده‌ی گشتی هه‌سه‌ده‌ واژۆكراوه‌، تا کۆتایی ئەمساڵ شه‌ڕڤانان ده‌خرێنه‌ناو هێزە چەکدارەکانی حکومەتی ئینتقالییەوە، هەروەها سەرجەم دامەزراوە مەدەنی و سەربازییەکان بە فڕۆکەخانە و کێڵگە نەوتییەکان و کێڵگە نەوتییەکانی باکوری ڕۆژهەڵاتی ئەو وڵاتەشەوە ڕادەستی دیمەشق دەکرێن.

نزیكه‌ی ساڵێكه‌ ئه‌حمه‌د شه‌رع ده‌سه‌ڵاتی له‌ دیمه‌شق وه‌رگرتوه‌ و حكومه‌تی ڕاگوزه‌ری پێكهێناوه‌، ئه‌وه‌ش دوای ئه‌وه‌ی مانگی 12ی ساڵی ڕابردو حكومه‌تی سوریا به‌ سه‌رۆكایه‌تی به‌شار ئه‌سه‌د ڕوخێنرا، به‌ڵام تائێستا له‌گه‌ڵ هێزه‌كانی هه‌سه‌ده‌ له‌سه‌ر چه‌ندین پرس نه‌گه‌یشتوه‌ته‌ ڕێكه‌وتن.

لەكۆتاییەكانی مانگی ڕابردو هاکان فیدانی وەزیری دەرەوەی توركیا، نوح یەڵمازی جێگری وەک نوێنەری وڵاتەکەی لە دیمەشق دیاركرد كە تا ئەوكات، تورکیا لەو وڵاتە نوێنەرایەتی دەکرا. دانانی یەکێک لە نزیکەکانی وەزیری دەرەوە وەک ئاماژەیەکی دیپلۆماسی گرنگ لێکدەدرێتەوە.

نوح یەڵماز، دیپلۆماتکارێکی بە ئەزمونی توركیایە و لە (ئایار/5)ی 2024ـەوە پیاوی دوەم بوە لە وەزارەتی دەرەوەدا. وەک فیدان، یەڵمازیش لە دەزگای هەواڵگری نیشتمانیی (میت)ـەوە هاتوە، و بە باشی زمانی ئینگلیزی دەزانێت.