مه‌زڵوم عه‌بدى وه‌ڵامى نه‌یارانى كورد ده‌داته‌وه‌

مەزڵوم عەبدی ڕایگەیاند، هەوڵەکان بۆ جێبەجێکردنی ڕێککەوتنی 10ـی ئادار بەردەوامە و ساڵی 2026 دەبێتە ساڵی پێشکەوتن و ئاوەدانکردنەوە دەبێت بۆ ڕۆژئاوای کوردستان. جەختیش دەکاتەوە، کە هێزی ژنان بۆ ئەوان هێڵی سوورە و دەبێت یەپەژە لەناو وەزارەتی بەرگرییدا سەربەخۆیی خۆی هەبێت.

لە میانی بەشداریکردنی لە بەرنامەیەکی تایبەتی کەناڵی (ئاریەن تیڤی)ـدا، مەزڵوم عەبدی، فەرماندەی گشتیی هێزەکانی سووریای دیموکراتیک (قەسەدە)، باسی لە ئەنتیگراسیۆنی نێوان قەسەدە و حکومەتی کاتی سووریا، مەترسییەکان لەسەر باکوور و ڕۆژهەڵاتی سووریا و ڕێککەوتنی 10ی ئادار کرد.

سەبارەت بە دۆخی نائارامی سووریا و بەردەوامی ئاڵۆزیی و هێرشەکان مەزڵوم عەبدی ڕایگەیاند: "هەندێک کێشە کاتی دەوێت، بەڵام لەوە زیاتر هێشتا عەقڵییەت نەگۆڕاوە و هەندێک لایەن هێشتا هاوشێوەی ڕژێمی بەعس بیردەکەنەوە، هێشتا بەشێوەیەکی بنەڕەتیی گۆڕانکاریی درووست نەبووە، هەوڵێک هەیە کە دەیانەوێت هەموو سووریا لەلایەن یەک گرووپەوە بەڕێوەببرێت، ئێمەش دەمانەوێت سووریایەک بونیادبنرێت کە ماف و ڕەنگی هەموو کەس و لایەنێکی تێدا هەبێت و گفتوگۆیەکی گشتیی هەمەلایەن هەبێت".

'كۆمەڵێک گرووپی توندڕەو لەناو حكومەتی دیمەشق چارەسەر و ڕێككەوتنیان ناوێت'
مەزڵوم عەبدی، فەرماندەی گشتی قەسەدە ئاماژەی بەوەشکرد: "كۆمەڵێک گرووپی توندڕەو لەناو حكومەتی دیمەشق چارەسەر و ڕێككەوتنیان ناوێت، بە تایبەت ئەو گرووپانەی كە پێشتر بۆ دەوڵەتی تورك كاریان كردووە و ئێستا تێكەڵاوی هێزەكانی حكومەت بوون، لە نمونەی، ئەوانەی ناویان لە خۆیان نابوو "سوپای نیشتیمانی"، ئەوانەی عەفرین و عەزاز و ناوچەكانی تریان داگیركرد. ئەوانە ئێستا بوون بە بەشێک لە دەوڵەت و دژی ئێمە و گەلانی باكوور و ڕۆژهەڵاتی سووریا دۆخەكە ئاڵۆز دەكەن".

سەبارەت بە پێشکەوتنەکان لە پێکهاتنی ڕێککەوتنی 10ی ئادار، عەبدی وتی: "هەوڵ بۆ جێبەجێکردنی ڕێککەوتنی 10ی ئادار هەیە و یەکێک لە دەستکەوتە گرنگەکانی چوونەبواری جێبەجێکردنی ئاگربەستە، بەڵام هەندێک بابەتی تر هێشتا پێکنەهێندراون و کاریان لەسەر دەکرێت.

گفتوگۆکان لە نێوانمان بەردەوامە و هێزی هاوپەیمانیش لەنێوانمان هەیە، بەڵام تورکیا و سووریا دەیانەوێت بابەتی سەربازیی چارەسەربکرێت و ئەوەیان وەک کێشەی سەرەکی خۆیان دیارییکردووە و ئێمەش وتمان دەتوانین گفتوگۆ لەو بارەیەشەوە بکەین".

'پێویستە دەستکەوتەکانی ژنان بپارێزرێت'
سەبارەت بە تێکەڵکردنی قەسەدە لەگەڵ وەزارەتی بەرگریی، مەزڵوم عەبدی گوتی: "ئێمە نامانەوێت بەشداربین لە وەزارەتی بەرگرییدا، بەڵکو دەمانەوێت پێکەوە وەزارەتەکە دروست بکەین و هەر لایەک خاوەنی ڕۆڵ و کاریگەریی خۆی بێت، ئێمە دەزانین لەناو وەزارەتدا هەندێک توندڕەو هەیە، لەلایەک دیکەشەوە حکومەتی سووریا بەڕووی هاوپەیمانیی نێونەتەوەییدا کراوەتەوە، بۆیە دەبێت ئەوان گۆڕانکاریی لە عەقڵییەتی خۆیاندا بکەن.

پێویستە دەستکەوتەکانی ژنان لە بواری سیاسیی و سەربازییدا لە سووریادا بپارێزرێت، بۆ یەپەژە پێشنیارمان وایە بۆ حکومەت کە لە چوارچێوەی لیوایەکدا لەناو وەزارەتی بەرگرییدا بەشێوەی سەربەخۆ ژنان دەستکەوتەکانی خۆیان بپارێزن. بابەتی ژن هێڵی سوورمانە و گەر ئەوە جێبەجێ نەکرێت ئەوا ئەنتیگراسیۆنی نێوان ئێمە و حکومەت پێکنایەت".

'داعش سەرقاڵی خۆڕێکخستنەوەیە'
هەروەها لەبارەی جموجۆڵەکانی چەتەکانی داعش و هێرشیان بۆسەر هێزەکانی ئەمریکا، مەزڵوم عەبدی وتی: "لە ئێستادا داعش خەریکی خۆڕێکخستنکردنەوەیە بەتایبەت لە ڕۆژئاوای فورات و ئەو ناوچانەی لەژێر دەسەڵاتی حکومەتی سووریادایە، ماوەی 10 ساڵ لەگەڵ هاوپەیمانان شەڕمان دژی داعش کرد بەڵام هیچ ڕووداوێکی هاوشێوەی هێرشی داعش بۆسەر هێزی ئەمریکی لە چەند ڕۆژی ڕابردوودا درووست نەبوو، ئەمەش بە هۆی ئەو پەیوەندییە توندوتۆڵەوەبوو کە لە نێوانمان هەیە. پێویستە حکومەتیش سوود لە ئەزموونمان وەربگرێت لەو بوارەدا".

'كۆتایی ئەمساڵ بۆ ئێمە سەرەتایە نەك كۆتایی'
مەزڵوم عەبدی لە کۆتاییدا گوتی: "زۆرێک لە نەیارەكانمان دەڵێن ڕێككەوتنی 10ی ئادار و كۆتایی ئەمساڵ، كۆتایی شۆڕشی ڕۆژئاوا و هەسەدەیە، بەڵام ئێمە دەڵێین كۆتایی ئەمساڵ بۆ ئێمە سەرەتایە نەك كۆتایی، سەرەتای ساڵی 2025 دەستپێكێکی نوێی پێشكەوتن و ئاوەدانكردنەوە دەبێت.

ساڵی 2026 بۆ كوردان دەبێتە ساڵی یەكێتی نەتەوەیی، ئێمە لەهەموو كات زیاتر نزیكتر دەبین لەوەی كورد لە هەر چوار بەشی كوردستان و ڕەوەندی کوردی یەكێتی خۆیان ڕێكبخەن و كۆنگرەی نەتەوەیی خۆیان ببەستن و سیاسەتێكی هاوبەشیان هەبێت، بۆ ڕۆژئاوای كوردستان 2026 دەبێتە ساڵی ئازادی و ساڵی مسۆگەركردنی پێگەی خۆی لە دەستووری سووریادا".