ئاسایش دەستگیرکردنی 21 تیرۆریستی لە سلێمانی ڕاگەیاند

ناوەندی هەواڵ

دەزگای ئاسایشی هەرێم و دەزگای ئاسایشی نیشتمانی عێراق دەستگیرکردنى 21 تیرۆرست ڕادەگەیەنن.

بەڕێوەبەرایەتی گشتی ئۆپراسیۆنەکانی ئاسایش لە ڕاگەیەندراوێکدا دەڵێت، لە چالاکییەکی هاوبەشی بەڕێوەبەرایەتی گشتی ئۆپراسیۆنەکانی دەزگای ئاسایشی هەرێمی کوردستان و دەزگای ئاسایشی نیشتمانیی عێراق، دوای بەدواداچوون و چاودێری وورد و ئاڵوگۆڕی زانیاری هەواڵگری ماوەی چەند مانگێک بەردەوام بووە، توانرا لە پارێزگای سلێمانی 21 تیرۆریستی داعش دەستگیربکەین.

بەپێی ڕاگەیەندراوەکە، لەناو دەستگیرکراوەکاندا، دوو گەورە بەرپرسی ئەمنی  ویلایەتی  فەلوجە و دیجلە هەبووە.

ئەوەشهاتووە، ئەو دەستگیرکراوانە داواکراون لەلایەن  دادگاکانی عێراق، تیرۆریستان بەئامانجی خۆحەشاردان ڕوویان لە هەرێمی کوردستان کردبوو، لەئەنجامی دانپێدانانەکانیان لە چوارچێوەی لێکۆڵینەوەکان دەرکەوت پیلاندانەر و بەشداری چەندین کردەوەی تیرۆریستی بوون. و لە ئێستادا تیرۆریستان بەماددەی( 4 )ی تیرۆر داواکراون لەلایەن دادگاکانی عێراق، لەبەر تایبەتمەندی کەیسەکانیان ڕادەستی دەزگای ئاسایشی نیشتمانی عێراق کراون.