لە غەززە شەڕ دەوەستێت

ناوەندی هەواڵ

ڕاپۆرتە ڕۆژنامەوانییەکان ئاشکرایانکردووە، بەمەبەستی دەستپێکردنی هەڵەمەتی کوتانی منداڵان دژی ئیفلیجی، ئیسرائیل و حەماس لەسەر ئاگربەستی کاتی گەیشتوونەتە ڕێککەوتن.

ئاژانسی رۆیتەرز لەسەر زاری ڕێکخراوی تەندروستیی جیهانییەوە بڵاویکردووەتەوە، نوێنەری تەندروستیی جیهانیی لە کەرتی غەززە رایگەیاندووە، لە ئێستادا 640 هەزار منداڵ لە غەززە دەژین، بە مەبەستی پاراستنیان لە نەخۆشیی ئیفلیجیی منداڵان، لە سێ شوێنی جیاواز لە رۆژی یەکشەممەوە دەستدەکرێت بە کوتانیان دژی نەخۆشی ئیفلیجی.

ئاماژەی بەوەشکردووە، ئەو هەڵمەتەکە سێ رۆژ بەردەوام دەبێت، لە کاتژمێر 06:00ـی بەیانی تا 03:00 دوانیوەڕۆ و لەو سێ رۆژەدا شەڕ دەوەستێت و چەکەکان بێدەنگ دەکرێن و ئاگربەست ڕادەگەیەنرێت.

دەزگای فریاگوزاریی کاری نەتەوەیەکگرتووەکان بۆ پەنابەرانی فەلەستینی (UNRWA) پێشتر رایگەیاندبوو، دوای 25 ساڵ یەکەم حاڵەتی ئیفلیجیی منداڵان لە غەززە تۆمارکراوە.