دەسەڵاتی دادوەری عیراق لێكۆڵینەوە لە سەرۆكی دەستەی دەستپاكی دەكات

ناوەندی هەواڵ

لە تێلیگرام یەکەم کەسیت هەواڵەکانت پێدەگات جۆینبە https://t.me/EradaMedia1

ئەنجومەنی باڵای دادوەری عیراق ڕایگەیاند، دۆسیەی لێکۆڵینەوە لە تۆمارە دەنگییەکانی حەیدەر حەنون سەرۆکی دەستەی دەستپاکی بە وەکالەت دەکاتەوە.

ناوەندیی ڕاگەیاندنی ئەنجومەنی باڵای دادوەری لە ڕاگەیەندراوێکدا بڵاویکردووەتەوە، سەرۆکی داواکاری گشتی داوای لە دادگای لێکۆڵینەوەی سێیەمی کەرخ کردووە، کە لێکۆڵینەوە لەو تۆمارە دەنگیەی حەنون بکات کە تاوانەکانی وەرگرتنی بەرتیل لەخۆدەگرێت.

تۆمارەكە، كە لە تۆڕە كۆمەڵایەتییەكان و میدیا ناوخۆییەكان بڵاوبووەتەوە، باس لە وەرگرتنی بڕە پارەیەكی زۆر و ئۆتۆمبێلێكی كادیلاك دەكرێت.

ھەفتەی ڕابردوو میدیاکانی عیراق ھەواڵی دەستگیرکردنی حەیدەر حەنونیان بە تۆمەتی وەرگرتنی بەرتیل بڵاوکردەوە، بەڵام دەستەی دەستپاکی سەرلەبەری ھەواڵەکەی ڕەتکردەوە و ڕایگەیاند، فەرمانەکە بە ھەڵە بڵاوکراوەتەوە.

هاوکات، لەبەیاننامەیەکدا دەستەی دەستپاكی عێراق ڕایگەیاندووە، تۆمارە دەنگییەكان درووستكراون، ئامانج لێی درووستكردنی كاریگەرییە لەسەر كارەكانی دەستەكەیان و هەوڵدانە بۆ ڕاگرتنی سەرۆکی دەستەکە لە بەردەوامبوون و جێبەجێكردنی ئەركە نیشتمانییەكەی.

حەیدەر حەنون ڕایگەیاندووە، ئەو تۆمارە دەنگییەی بڵاوکراوەتەوە، پەیوەندی بە وەرگرتنی زەوییەوە ھەیە کە پێشتر لەلایەن مستەفا کازمیەوە دراوە بە سەرۆک و ئەندامانی ئەنجومەنی باڵای دادوەری و دادگای باڵای فیدراڵی و وەزیرەکان، ئەوانیش لەو چوارچێوەیەدا سودمەندبوون.