ئەنجوومەنی نوێنەرانی عێراق دەست بەدانیشتنەکانى دەکاتەوە

ناوەندی هەواڵ

بڕیارە ئەمڕۆ ئەنجوومەنی نوێنەرانی عێراق کۆبێتەوە و لە کۆبوونەوەکەدا تاوتوێى سێ پرۆژە یاسا بکات، لە یەکێک لەتەوەرەکانیش خوێندنەوەی دووەم بۆ هەموارى یاسای لێبوردنی گشتی دەکرێت.

دەستەی سەرۆکایەتیی ئەنجومەنی نوێنەرانی عێراق لە ڕاگەیەندراوێکدا بڵاویکردەوە، ئەمڕۆ دووشەممە 16-9-2024، ئەنجوومەنی نوێنەرانی عێراق کۆدەبێتەوە و گفتوگۆ لەسەر سێ پرۆژەیاسا دەکات، کە لە رابردوودا مشتومڕ و ناکۆکیی زۆری لەنێوان پێکهاتەکاندا لەسەر بووە.

بە پیى کارنامەى کۆبوونەوەکە لە تەوەری یەکەمدا دەنگ لەسەر پرۆژەیاسای گەڕانەوەی ئەو موڵکانە دەدرێت بۆ خاوەنەکانیان، کە بەهۆی بڕیارەکانی ئەنجوومەنی سەرکردایەتیی شۆڕشەوە لە سەردەمی رژێمی بەعسدا لێیان وەرگیراوەتەوە.

تەوەرێکی دیکەی کۆبوونەوەکە، ئەنجامدانی خوێندنەوەی دووەمە بۆ پرۆژەیاسای هەموارى یاسای بارى کەسیی عێراق و کە بڕیاربوو لە 3ى ئەم مانگە خوێندنەوەی دووەم بۆ پرۆژەیاساکە بکرێت، بەڵام بەهۆی ناکۆکیی فراکسیۆنەکانەوە دانیشتنەکە دواخرا.

تەوەرێکى دیکەى کۆبوونەوەکەى ئەمڕۆ تایبەتە بە خوێندنەوەی دووەم بۆ هەموارى یاسای لێبوردنی گشتی .