کریستیانۆ ڕۆناڵدۆ نەخۆشەو نایەتە عێراق

ناوەندی هەواڵ

کریستیانۆ ڕۆناڵدۆ، ئەستێرەی پۆرتوگالی و یانەی نەسری سعودی نایەتە عێراق و بەشداری لە یارییەکەی سبەی بەرامبەر یانەی شورتە ناکات.

یانەی نەسڕی سعودی ڕایگەیاند، کریستیانۆ ڕۆناڵدۆ نەخۆش کەوتووە و لەگەڵ تیمەکەماندا سەردانی بەغدا ناکات بۆ ڕووبەڕووبوونەوەی یانەی شوڕتە.
 
یانەی نەسری سعودی، لە ڕاگەیێنراوێکدا دەڵێت"کاپتنی تیپی یەکەمی یانەکەمان، کریستیانۆ ڕۆناڵدۆ تووشی پەتایەک بووە، دوای ئەوەی پزیشکەکان هەڵسەنگاندنیان بۆ بارودۆخی تەندروستی یانەکە کرد، بەپێی ڕاپۆرتی پزیشکی بڕیادراوە ئەمڕۆ یاوەری تیپەکە نەکات لەو گەشتەکەیاندا."
 
ڕاگەیەندراوەی یانەی نەسڕ لە کاتێکدایە لە ماوەی 24 کاتژمێری ڕابردوودا، هەزاران هاندەر لە شارە جیاجیاکانی عێراق چوونەتە بەغدا بۆ ئەوەی بلیتی یاریی نێوان هەردوو یانەی شورتە و نەسڕ بکڕن و بەپێی هەواڵی میدیاکان لە بازاڕی ڕەشدا نرخی بلیتەکە گەیشتووەتە سەروو 200 هەزار دینار.
 
بەپێی پرۆتۆکۆڵی وەرزشی عێراق، لەکاتی گەیشتنی یانەی نەسڕ بۆ بەغدا، هەریەکە لە عەدنان درجال، سەرۆکی فیدراسیۆنی تۆپی پێی عێراق، ئەحمەد موبەقع، وەزیری لاوان و وەرزش، ئەیاد بونەیان، ڕاوێژکاری سەرۆک وەزیران بۆ کاروباری وەرزش و نەشئەت ئەکرەم، ئەستێرەی پێشووی تۆپی پێی عێراق لەگەڵ چەند کەسایەتییەکی دیکەی وەرزشی وڵاتەکە پێشوازی لە یانەکە دەکەن.
 
ئامادەبوونی نەشئەت ئەکرەم، دەگەڕێتەوە بۆ ئەوەی پێشتر لە یانەی نەسڕ یارییکردووە و شەوی شەممە لە ڤیدیۆیەکدا کە لە پەیجی سەرەکی یانە سعودییەکە بڵاوکرایەوە، بەدرێسی نەسڕەوە بەخێرهاتنی یاریزانانی یانەی پێشووی دەکات.

دوێنێ میدیاكانی عێراق بڵاویانکردەوە، ڕۆناڵدۆ و جۆرجینا ڤیزای عێراقیان وەرگرتووە، بەڵام جۆرجینا رۆدریگێز، خۆشەویستەکەی کریستیانۆ ڕۆناڵدۆ ڕایگەیاند، کە ئەو نایەتە عێراق و هەر لە سعودیە دەمێنێتەوە.

ڕۆژی دوشەممە لە یەکەم یارییاندا لە خولی بژاردەی یانە پاڵەوانەکانی ئاسیا، یانەی شورتەی عێراقی لە یاریگەی مەدینە میوانداری یانەی نەسڕ دەکات، یارییەکە کاتژمێر 19:00 بەکاتی عێراق بەڕێوەدەچێت.