نوێترین زانیاری لەسەر دابەشکردنی مووچەی فەرمانبەرانی هەرێمی کوردستان

ناوەندی هەواڵ

شەوى ڕابردوو وەزارەتى دارایی هەرێم ڕایگەیاند، چاوەڕوانن بەغدا تەواوکاریی مووچەى مانگى ئاب بنێرێت، بەڵام تا ئیستا وەزیرى دارایی عێراق ڕەزامەندى لەسەر ناردنى ئەو بڕە پارەیە نەداوە.

هەرچەندە ئەو شاندەی  وەزارەتى دارایی هەرێمى کوردستان کە لەبەغدا بوون و بەووتەی خۆیان هەردوو لیستى مووچەى مانگى ئاب و ئەیلوولیان ڕادەستى بەڕێوەبەرە گشتییەکانى وەزارەتى دارایی فیدراڵ کردووە، بەڵام بەهۆى ئەوەى تەیف سامى، وەزیرى دارایی عێراق لە کۆبوونەوەى بانکەکانى ئاسیا بووە لە ئۆزباکستان شاندەکەى هەرێمى کوردستانى نەبینیوە، بەپێی زانیارییەکانیش تا وەزیری دارایی عێراق لەسەفەرەکەی نەگەڕێتەوەو واژو لەسەرناردنی پارە نەدات مووچە دابەشناکرێت.

هەر بەگوێرەى ئەو زانیارییانە، هەردوو لیستى مووچەى مانگى ئاب و ئەیلوول و دەرئەنجامى کۆبوونەوەى بەڕێوەبەرە گشتییەکانى وەزارەتى دارایی هەرێمى کوردستان و وەزارەتى دارایی فیدراڵ ئامادەکراوە بۆئەوەى رۆژى 29ی ئەیلول بخرێتە بەردەم تەیف سامى و بڕیارى لەسەربدات.

وەزارەتى دارایی هەرێمى کوردستان شەوى ڕابردوو ڕایگەیاند، بەغداد ڕەزامەندى لەسەر ناردنى تەواوکارى مووچەى مانگى ئابى مووچەخۆرانى هەرێمى کوردستان نیشانداوە، چاوەروانن پارەکە بگاتە هەرێمى کوردستان و دەست بە دابەشکردنى مووچەبکەن.