لە توركیا هەزاران كەس بۆ مووچە دەستیان بە خۆپیشاندان كرد

ناوەندی هەواڵ

هەزاران كەس لە ئەنقەرەی پایتەختی توركیا دەستیان بە خۆپیشاندان بۆ زیادكردنی مووچەی بنەڕەتی كاركردن لەو وڵاتە، دروشمی دەستلەكاركێشانەوەی حكومەت و ناڕەزایەتیان بەرزكردووەتەوە.
هەفتەی ڕابردوو حكومەتی توركیا ڕایگەیاند، كەمترین مووچەی هەر كارمەندێكی حكومەت و كەرتی گشتیی لەو وڵاتە بۆ ساڵی 2025 ، 22104 لیرە دەبێت، كە نزیكەی 630 دۆلار دەكات، ئەمەش بەراورد بە ساڵی 2024 لە 30% زیادیكردووە.
حكومەت وەك خۆی دەڵێت ئەو هەنگاوەی لەپیچناو زیاتر ڕێكخستنی دارایی و بەرەنگاربوونەوەی هەڵاوسانە.
كرێكاران و فەرمانبەرانی توركیا كە بەردەوام ڕووبەڕووی قەیرانی تێچووی ژیان دەبنەوە لەگەڵ هەڵاوسان بە ڕێژەی 45% دەیانەوێت كرێی بنەڕەتییان بۆ 70% بەرزبكرێتەوە.
پارتی گەلی كۆماری كە گەورەترین پارتی ئۆپۆزسیۆنی توركیایە، پشتیوانی خۆپیشاندانەكان دەكات، پێی وایە ڕەجەب تەیب ئەردۆغان سەرۆك كۆماری توركیا ئاگای لە واقیعی وڵاتەكە نەماوە.
لەوبارەیەوە، ئۆزگور ئۆزێل، سەرۆكی پارتی گەلی كۆماری لە ناو خۆپیشاندەرانەوە ڕایگەیاند:"دەڵێن ئەگەر زیاتر مووچەی بنەڕەتی زیاد بكەین هەڵاوسان زیاتر دەبێت، ئەمە درۆیەكی گەورەیە، بەدرێژایی ساڵ هیچ زیادبوونێك لە كرێی بنەڕەتی مووچەدا نەبووە و هەڵاوسانیش 50% یە".