مەشعان جبورى: کشانەوەی کورد لەپرۆسەی سیاسی سەقامگیریی لەعێراق ناهێڵێت

مەشعان جبوری کەسایەتی سیاسی عێراق رایگەیاند، کشانەوەى کورد لەپرۆسەی سیاسی عێراق تەنها ئامادەنەبون نییە لەپرۆسەکە، بەڵکو ڕوخانی بەشێکی شەرعییەتی نیشتمانییە، زۆر زەحمەتە عێراق بتوانێت بەرپرسیارێتی کاردانەوەکانی ئەو بڕیارەی کورد بگرێتە ئەستۆ.

لەتۆڕی کۆمەڵایەتی ئێکس مەشعان جبوری کەسایەتی سیاسی عێراق لە پەیامێکدا دەڵێت، کشانەوەی کورد لەپرۆسەی سیاسی عێراق ڕوداوێک نابێت بەئاسانی تێپەڕبێت، بەڵکو بومەلەرزەیەکەو سەقامگیریی لەعێراق ناهێڵێت، چونکە کورد بەشداریی سەرەکی ڕوخاندنی ڕژێمی سەدام بون، لەگەڵ کردنەوەی دەرگای نێودەوڵەتی بەڕوی ئۆپۆزسیۆن.

دەشڵێت، هیچ جێگرەوەیەک بۆ گفتوگۆو دیالۆگ نییە.

پەیامەکەى جبورى لە کاتێکدایە لە ئێستادا  کۆبونەوەی پارت ‌و لایەن ‌و هێزە سیاسییەکانی کوردستان لەپیرمام لەپێناو وەرگرتنی هەڵوێستێکی یەکلاکەرەوە بەرامبەر بەغداو پێشێلکردنی دەستور بەڕێوەدەچێت.