هەسەدە گورزى گەورە لە سوپاى سوریا دەدات

پاش ئەوەى لە ماوەى چەند رۆژى رابردودا بەردەوام هێزەكانى سوپاى سوریا لە ناوچەكانى ژێر دەستى هێزەكانى سوریاى دیموكرات "هەسەدە" بە مەبەستى لەشكركێشى و داگیركاریى نزیكدەبونەوە، هێزەكانى سوریاى دیموكرات لە وەڵامى ئەو لەشكركێشییانەدا گورزى گەورەیان لەسوپاى سوریادا.

ئەمڕۆ سێشەممە وه‌زاره‌تی به‌رگریی سوریا لە بەیاننامەیەكدا دانى بەوەدا ناوە، كە هێزه‌كانی سوریای دیموكرات دزه‌یان كردۆته‌ ناو پێگه‌كانی سوپای سوریا له‌ ناوچه‌ی ته‌ل ماعز له‌ ڕۆژهه‌ڵاتی حەڵەب و توانیویانە سەربازێكى سوپاى سوریا بكوژن و له‌ئه‌نجامیشدا پێكدادانی سەخت  له‌نێوانیاندا رویداوە.

بەپێى راپۆرتەكانى میدیاى سوریا و رۆژاڤا، هەسەدە لەچوارچێوەى یاساى شەڕدا وەڵامى سوپاى سوریاى داوەتەوەو هەوڵى لەشكركێشى سوپاى داگیركەریى سوریاى پوچەڵكردۆتەوەو سوپاكەیان ناچار بە كشانەوە كردوە.

هاوكات، بەگوێرەى راپۆرتە رۆژنامەوانییەكانى رۆژاڤا، ئه‌م هه‌ڵكشانه‌ له‌كاتێكدایه‌ كه‌ هێزه‌كانی سوپاى داگیركەرى سوریا به‌رده‌وامن له‌ به‌ئامانجگرتنی ناوچە سنورییەكانى هێزەكانى سوریاى دیموكرات "هەسەدە" له‌ نزیك ناوچه‌كانی مه‌نبه‌ج و دێرحا‌فر.

 ئەو راپۆرتانە ئەوەشیان خستۆتەڕو كە بەهۆى گرژییەكانەوە و به‌شێوه‌یه‌كی پچڕ پچڕ هه‌ندێك لە ڕێگاكانی شاری حەڵەب نزیكبونەتەوە لە داخستنى تەواوەتى، ئەمەش لەکاتێکدایە حكومەتەكەى شەرع  ڕێککەوتنی لەگەڵ  مەزڵوم عەبدى  كردووە بەڵام خۆیان  پابەندنابن  بە رێككەوتنەكەوە.

جێى ئاماژەیە دوێنى هێزه‌كانی سوریای دیموكرات "هەسەدە" دەربارەى جموجۆڵی هێزه‌كانی سوپای داگیركەرى سوریا هۆشدارییاندابو لەوەى كە ماوه‌ی چه‌ند رۆژێكه‌ هێزه‌كانی سه‌ر به‌ حكومه‌تی دیمه‌شق، هه‌وڵی وروژاندن و دنه‌دانی هێزه‌كانمان ده‌ده‌ن له‌چه‌ند ناوچه‌یه‌ك و هه‌ڵسوكه‌وتی ئیستفزازانه‌ ئه‌نجامده‌ده‌ن.