لەئۆردوگاکانی لیبیاوە تا ڕۆژهەڵاتی فورات... تورکیا 25 هەزار چەتە دژی كورد کۆدەکاتەوە

ئیرادە میدیا

سەرچاوە سورییەکان ئاشکرایانکرد، تورکیا خۆی بۆ ئۆپەراسیۆنێکی سەربازیی پێشبینیکراو لەڕۆژهەڵاتی ڕوباری فورات له‌دژی هێزەکانی سوریای دیموکرات (هەسەدە) ئامادە دەکات، کە هەزاران چەتەو تیرۆریست کۆدەکاتەوە کە لەژێر فەرماندەیی تورکیادا چالاکی دەکەن.

ئەو سەرچاوانە باسیان له‌وه‌كردوه‌، لێدوانەکانی تورکیا کە دوایینیان ڕاگەیاندنی ڕەجەب تەیب ئەردۆغان سەرۆک کۆماری تورکیا بوە کە تورکیا "ڕەنگە بەمنزیکانە ئۆپەراسیۆن" لەڕۆژهەڵاتی ڕوباری فورات دژی هێزەکانی سوریای دیموکرات (هەسەدە) دەستپێبکات، چونكه‌ جه‌ختیكردوه‌ته‌وه‌، هه‌سه‌ده‌ هه‌ر په‌كه‌كه‌یه‌.

ئەردۆغان وتبوى، ئۆپەراسیۆنەکە چالاکیی ئاسمانی‌و زەمینی لەخۆدەگرێت‌و هەموو ئامادەکارییەکان‌و پلانی ئۆپەراسیۆنەکان تەواوبون.

کۆکردنەوەی چەتەو تیرۆریست

لەو چوارچێوەیەدا، سەرچاوەکان ئاماژەیان بەوەکردوە، تورکیاو قەتەر ئاسانکارییان کردوە بۆ چونە ژورەوەی 25 هەزار چەتە لەڕێگەی لیبیاو جەزائیرەوە بۆ ناو تورکیا کە دواتر گواستراونەتەوە بۆ ناو خاكى سوریا.

ئامانجیش لێی پەیوەستبونیانه‌ به‌و هێزه‌ى دیكه‌ى حكومه‌ته‌كه‌ى شه‌رع كه‌ ئێستا له‌ناوچه‌كانى (درعا، حومس، سوەیداو دێرەزۆر) مۆڵدراون‌و ئەگەری هەیە ناوچەکانی ڕۆژهەڵاتی فورات لەژێر کۆنترۆڵی هێزەکانی سوریای دیموکرات (هەسەدە) بکەنە ئامانج.

ئەو سەرچاوانە باسیان له‌وه‌كردوه‌، تورکیاو قەتەر ئۆردوگای مەشقی جیهادییەکان لەناوچە بیابانییەکانی سەر سنوری لیبیاو جەزائیر دەپارێزن، ئەمەش کارئاسانی بۆ ڕاهێنانیان دەکات بۆ خزمەتکردنی بەرژەوەندییەکانی تورکیا.

تورکیا چەندینجار ئامادەیی خۆی بۆ دەستپێکردنی ئۆپەراسیۆن دژی شه‌ڕڤانانى كورد نیشانداوه‌و هه‌میشه‌ش به‌هێزى تیرۆریست ناوى بردون، له‌كاتێكدا ئه‌مریكا به‌هێزى ڕزگاركه‌رو گه‌وره‌ترین تێكشكێنه‌رى داعش‌و هاوپه‌یمانى سه‌ره‌كى خۆى ناویان ده‌بات.

به‌ڵام توركیا سڵى له‌ئه‌مریكا نه‌كردوه‌ته‌وه‌و ئۆپەراسیۆنەکانی قەڵغانی فورات‌و چڵه‌ زەیتون‌و بەهاری ئاشتیی له‌دژى شه‌ڕڤانان ڕاگەیاندوە، تەنها لەچوارچێوەیەکی دیاریکراودا ئۆپەراسیۆنی یەکلاکەرەوەی لەڕۆژهەڵاتی فورات ئەنجامداوە.

فشارەکانی تورکیا بۆ سەر شەرع

شرۆڤەکاران ئاماژه‌ به‌وه‌ده‌كه‌ن، تورکیا داوای ڕەزامەندیی‌و بەشداریی حکومەتەکەی ئەحمەد شه‌رع دەکات لەهەر ئۆپەراسیۆنێکی سەربازیی دژی هێزەکانی سوریای دیموکرات (هەسەدە).

فشارەکانی تورکیا بەردەوامن لەڕازیکردنی دیمەشق بۆ بەشداریکردن لەئۆپەراسیۆنێکی سەربازی بەرفراوان، بەڵام شه‌رع ترسى هه‌یه‌ له‌نیگه‌رانى‌و کاردانەوەی شەقامی سوریاو دەوڵەتانی ناوچەیی‌و کۆمەڵگەی نێودەوڵەتی، كه‌ له‌دواى دوای تاوانەکان دژی عەلەوییەکان لەکەناراوەکانی سوریاو ڕوداوەکانی سوه‌یدا ڕوبه‌ڕوى بوه‌ته‌وه‌و ترسى هه‌یه‌ له‌گه‌ڵ توركیا ئه‌و ئۆپه‌راسیۆنه‌ بكات‌و ده‌سه‌ڵاته‌كه‌ى له‌لایه‌ن كۆمه‌ڵگه‌ى نێوده‌وڵه‌تیه‌وه‌ بكه‌وێته‌ مه‌ترسیه‌وه‌.

لیژنەیەکی نەتەوەیەکگرتوەکان پشتڕاستیکردوه‌ته‌وه‌، ئۆپەراسیۆنە سەربازییەکانی حکومەتی شەرع لەکەناراوەکانی سوریا دەگاتە تاوانی جەنگ‌و جینۆساید، حیکمەت هیجری ڕێبەری ڕۆحی کۆمەڵگەی یەکپارچەیی دروز داوای پێکهێنانی لیژنەیەکی لێکۆڵینەوەی نێودەوڵەتی لەڕوداوەکانی سوه‌یدا كردوه‌.

ڕێککەوتننامەکانی هاوکاریی سەربازیی تورکیاو سوریا.

سه‌رچاوه‌كان باس له‌خێرایی‌و نزیکبونەوەی ئەنكەرە‌و دیمەشق ده‌كه‌ن‌و جه‌ختده‌كه‌نه‌وه‌، له‌ڕێكه‌وتنى سەربازیی‌و ئامادەکاریی بۆ ڕێککەوتنێكى گه‌وره‌ى سه‌ربازیى له‌مێژوى ئه‌و دوو وڵاته‌دا.

بەگوێرەی سەرچاوەکان، ڕێککەوتنەکە بریتی دەبێت لەدامەزراندنی سێ بنکەی سەربازیی تورکیا لەسوریا، یەکەمیان لەشاری ته‌دمور لەناوەڕاستی سوریا، دوەمیان لەفڕۆکەخانەی سەربازی T4 لەپارێزگای حومس، سێیەمیشیان لەفڕۆکەخانەی سەربازیی مێناغ لەلادێکانی حەلەب.

سەردانە چارەنوسسازەکەی فیدان بۆ دیمەشق لەچوارچێوەی چڕکردنەوەی گوشارەکانی سەر حکومەتی سوریا بۆ خێراترکردنی جێبەجێکردنی ڕێککەوتنی یەکگرتن لەگەڵ هێزەکانی سوریای دیموکرات (هه‌سه‌ده‌) بوو.

سەرچاوەکان باس له‌وه‌ده‌كه‌ن، سەردانەکەى ئه‌مدواییه‌ى فیدان، بەشێکی تیشکیخستوه‌تەسەر هەوڵێک بۆ ڕێگریکردن لەکۆبونەوەیەکی پلان بۆ داڕێژراوی نێوان مه‌زڵوم عه‌بدى سه‌ركرده‌ى دیارى كورد له‌ڕۆژئاواى كوردستان‌و ئه‌حمه‌د شه‌رع سه‌رۆكى سوریاو وەزیری دەرەوەی سوریا لەپاریس.

ئەنكەرە بەدڵنیاییەوە ترسی ئەوەی هەیە کە فەرەنسا کە بەئاشکرا داوایکردوە، کورد بەشداربێت لەداڕشتنی داهاتوی سوریا، ئەگەر دانوستانەکان لەپایتەختی فەرەنسا بەڕێوەبچن، کاریگەرییان لەسەر ئەو دانوستانانە لەبەرژەوەندیی كورد دەبێت.

کۆنفرانسی حەسەکەو ترسی جیابونەوە لەسوریا

کۆنفرانسی (ئیدارەی خۆسەری باکوری ڕۆژهەڵاتی سوریا) نیگەرانییەکانی لەناو دڵى دیمەشق‌و ئەنكەرەدا وه‌ك بۆمبێكى چێندراو ته‌قانده‌وه‌و نه‌یانشارده‌وه‌، ترسیان هەیە کە هێزەکانی سوریای دیموکرات (هه‌سه‌ده‌) ببنە هێزێکی سیاسیی کە لەسوریاو ناوچەکەو کۆمەڵگەی نێودەوڵەتی قبوڵکراون.

ئیدارەی خۆسەری باکوری ڕۆژهەڵاتی سوریا ڕۆژی 8ی ئه‌م مانگه‌ کۆنفرانسێکی به‌دروشمی "یەکێتی هەڵوێست بۆ پێکهاتەکانی باکوری ڕۆژهەڵاتی سوریا" سازکرد، لەکۆنفرانسەکەدا نزیکەی 400 کەسایەتی لەڕۆژهەڵاتی فوراتەوە بەشداربون، ئەمە جگە لەبەشداریکردنی ڤیدیۆیی شێخ حیکمەت هیجری دروزو شێخ غەزەل غەزەلی عەلەوی.

لەبەیاننامەی کۆتایی کۆنفرانسەکەدا داوای داڕشتنی دەستورێکی نوێ لەسەر بنەمای پرەنسیپەکانی دیموکراسی فرەیی‌و لامەرکەزیی ئیداریی‌و سیاسیی، هاوکات دەستەبەرکردنی نوێنەرایەتی هەموو پێکهاتە نەتەوەیی‌و ئایینییەکان كرا.

ئەنكەرە 30 ڕۆژ مۆڵەتی بەهێزەکانی سوریای دیموکرات (هەسەدە)دا بۆ ئەوەی بڕیاربدەن ئایا پەیوەندیی بەدیمەشق‌و سوپای نوێى سوریاوه‌ بکەن‌و کۆنتڕۆڵی ناوچەکەش ڕادەستی ئیدارەی نوێى حكومه‌تى سوریا بکەنەوە.