قه‌ندیل په‌یامێك له‌باره‌ى ئیمراڵیه‌وه‌ بڵاوده‌كاته‌وه‌و هێرشده‌كاته‌سه‌ر شه‌رع

ناوەندی هەواڵ

دوران كاڵكان یه‌كێك له‌سه‌ركرده‌ دیاره‌كانى قه‌ندیل، په‌یامێك ئاراسته‌ى ئه‌ردۆغان ده‌كات‌و ڕایده‌گه‌یه‌نێت، "بەتورکی‌و ڕون‌و ڕەوان قسەدەکەین‌و دەڵێین؛ هەموو شتێک پەیوەستە بەئازادیی جەستەیی ئۆجەلانەوە، بەبێئەوە، هەر قسەو کردارێک، جگە لەنیازپاکی، هیچی دیکە نییەو هیچ ئەنجامێکی نابێت".


دوران کاڵکان ئەندامی ئەکادیمیای زانستە کۆمەڵایەتییەکانی عەبدوڵڵا ئۆجەلان لەچاوپێكه‌وتنێكدا لەگەڵ مەدیا خەبەر وتى، "ماوەی مانگێکە دیدار لەگەڵ ئۆجەلان نەکراوەو نازانین لەئیمراڵی چی ڕودەدات، ئەوەش پێی ناوترێت گفتوگۆی ئاشتیی‌و دیموکراسی، بچیتە ئیمراڵی‌و لەگەڵ کەسێکدا قسە بکەیت، کە بەبارمتەگیراوەو هیچ گۆڕانکارییەک لەڕەوشەکەیدا نەکراوە".

كاڵكان له‌په‌یامێكدا بۆ ئه‌ردۆغان‌و باخچه‌لى وتى:"بەتورکی‌و ڕون‌و ڕەوان قسەدەکەین‌و دەڵێین؛ هەموو شتێک پەیوەستە بەئازادیی جەستەیی ئۆجەلانەوە، بەبێئەوە، هەر قسەو کردارێک، جگە لەنیازپاکی، هیچی دیکە نییەو هیچ ئەنجامێکیشى نابێت".

به‌وته‌ى دوران كاڵكان، "سیاسەتی دەسەڵات لەتورکیا، ڕەوشی سیاسیی‌و بەبارمتە هێشتنەوەی ئۆجەلان لەئیمراڵی، نەگونجاوه‌ لەگەڵ بنەماکان‌و ڕۆحی پڕۆسەکەو ئاشتییش".

سه‌ركرده‌ دیاره‌كه‌ى قه‌ندیل ئاماژه‌ى به‌وه‌شداه‌، "شاندی ئیمڕاڵی دواینجار 25ی تەمموز سەردانی ئۆجەلانی کرد، ئه‌وه‌ ماوەی نزیکەی مانگێکە هیچ دیدارێک لەگەڵ ئۆجەلان نەکراوە، تەنانەت ئۆجەلان ناتوانێت لەگەڵ ئەوکەسانەش قسە بکات کە نوێنەرایەتییان دەکات، واته‌ بەبارمتەگیراوە".

سه‌باره‌ت به‌بونى كه‌ناڵێكى ڕاسته‌وخۆى په‌یوه‌ندیى له‌نێوان ئۆجه‌لان‌و قه‌ندیل، كاڵكان ئه‌و بابه‌ته‌ى به‌ده‌نگۆ ناوبردو جه‌ختیكرده‌وه‌، "ئۆجەلان هیچ پەیوەندییەکی لەگەڵ پەکەکەدا نییەو گفتوگۆشان لەگەڵ ناکات، لەگەڵ ئەوەی دەبوو ئامادەکاریی بکرێت‌و شاند دروستبکرێت، بەڵام هیچ هەنگاوێک نەنراوە".

دوران كاڵكان هۆشداریده‌دات‌و ڕایده‌گه‌یه‌نێت، "لیژنەی هاودەنگیی نیشتمانی، برایەتی‌و دیموکراسی په‌رله‌مان كه‌ له‌سه‌ر پێشنیازى ئۆجەلان پێكهێندراوه‌،پێویستە لیژنەکە سەردانی ئیمڕاڵی بکات، با هەموو کەس بزانێت، ئەگەر ئۆجەلان لەئیمڕاڵی بەبارمتە بهێڵدرێتەوە، لیژنە پەرلەمانییەکە یەک ملیمیش بەرەوپێشچون بەخۆیەوە نابینێت‌و تەنها قسە بۆخۆیان دەکەن".

به‌بیرى هێنایه‌وه‌، "دەوڵەت باخچەلی خۆی داوایکرد، ئۆجەلان بچێتە پەرلەمان‌و قسە بکات، بەڵام داواکەى تەنها وەک قسە ماوه‌ته‌وه‌و جێبەجێناکرێت، لەوە تێناگەین، بۆچی قسەکانی باخچەلی جێبەجێناکرێن؟، مادام لیژنەکە لەپەرلەمانەو هەموان دەچنە پەرلەمان، پێویستە ئۆجەلان‌و شاندەکەشی بچنە پەرلەمان‌و گوێیان لێبگیرێت‌و کاتیان پێبدرێت، ئەوکاتە لیژنەکە کارێکی ڕاست‌و دروستدەکات‌و ئەنجامی دەبێت".

ئه‌وه‌شى وتوه‌، "لەکاتێکدا کورد دەیەوێت لەگەڵ دەوڵەتی تورکیا ئاشتیی بکات، دەبوو سیاسەتێکی نوێ پەیڕەو بکرێت، بەڵام هیچ گۆڕانکارییەک لەسیاسەتی ئاکپارتیدا ڕوینەداوە، ئێمه‌ هیچ گۆڕانکارییەک نابینین، سیاسەتی دەسەڵات تائێستا دژ بەکوردەو دەیەوێت هێزو دەسەڵاتی کورد لەتورکیا، سوریا، عێراق‌و ئەوروپاش لەناوببات".

کاڵکان هێرشیكرده‌سه‌ر ئه‌حمه‌د شه‌رع سه‌رۆكى سوریاو ڕایگه‌یاند، "توركیا نایه‌وێت كورد له‌سوریا هیچ ماف‌و ده‌ستكه‌وتێكى هه‌بێت، سوریاش به‌قسه‌ى ده‌كات، هه‌روه‌ها کشانەی سوریاش لەکۆبونەوەکانی پاریس لەگەڵ دەسەڵاتی خۆسەر، هۆكاره‌كه‌ى توركیا بوو".

زیاتر له‌وباره‌یه‌وه‌ وتى، "هێزە نێودەوڵەتییەکان‌و هاوپەیمانیی نێودەوڵەتی هاتنەسەر هێڵ، بۆ ئەوەی لەپاریس کۆبونەوە بکرێت، بەڵام هاکان فیدان چوە سوریاو کۆبونەوەکە ڕەتکرایەوە، هەموو کەسێک دەزانێت ئەحمەد شەرع لەسەر بنەمای بۆچونەکانی فیدان بەشداریی لەکۆبونەوەکانی پاریسدا نەکرد".