مه‌لا به‌ختیار سه‌رۆك كۆمارو به‌رپرسانى باڵاى هه‌رێم له‌مه‌ترسیه‌ك ئاگادارده‌كاته‌وه‌

ناوەندی هەواڵ

مەلا بەختیار له‌نامه‌یه‌كدا، سه‌رۆك كۆمارى عێراق كه‌ كورده‌و هاوكات به‌رپرسانى باڵاى هه‌رێمى كوردستانیش له‌مه‌ترسیه‌كى گه‌وره‌ ئاگادارده‌كاته‌وه‌، ڕایده‌گه‌یه‌نێت، "ئه‌گه‌ر نه‌توانن له‌خانه‌قین‌و كه‌ركوك به‌رگریی له‌ده‌ستكه‌وته‌كانی په‌روه‌رده‌و خوێندنی باڵا بكه‌ن، به‌دڵنیاییه‌وه‌، له‌ده‌ستدانی ئه‌م ده‌ستكه‌وتانه‌، تێكشكانی یه‌كه‌مین سه‌نگه‌ری به‌ره‌نگاری كوردستانه‌، به‌رامبه‌ر ته‌عریبی نوێ، بێگومان شكستی تریشی به‌دوادادێ".

مەلا بەختیار، نامەیەکی کراوەی دەربارەی کێشەی خوێندکارانی خانەقین‌و دژایەتیکردنیان ئاڕاستەی، سەرۆک کۆمارو سەرۆکی هەرێمی کوردستان‌و سەرۆکی حکومەتی هەرێمی کوردستان‌و پەرلەمانتاران کردوەو داوایان لێدەکات، "بەهانایانەوە بچن".

مەلا بەختیار کە خۆی خەڵکی خانەقینە لەنامەکەیدا نوسیویه‌تى، "ئێستا خوێندكارانی كۆلێژه‌كان، دژی دژایه‌تی كۆلێژه‌كان له‌عێراق‌و كوردستان، مانیانگرتوه‌، ده‌ستخۆشییان لێده‌كه‌م‌و هیوادارم سه‌ركه‌وتوبن".

هه‌ر له‌نامه‌كه‌یدا وتویه‌تى، "ئه‌م كێشه‌یه‌، به‌وه‌زاره‌تی خوێندنی باڵاى هه‌رێم یه‌كاڵا ناكرێته‌وه‌، پێویسته‌ حكومه‌تی هه‌رێم به‌پاڵپشتی سه‌رۆك كۆماری عێراق‌و فراكسیۆنه‌ كوردستانییە‌كان له‌په‌رله‌مانی عێراق، بیخاته‌ به‌رنامه‌وه‌و له‌گه‌ڵ به‌غدا قسه‌ بكرێ، هیچ نه‌بێ هه‌تا كێشه‌ی ماده‌ی 140 ساغده‌بێته‌وه‌، دوژمنایه‌تی كۆلێژه‌كان نه‌كرێ، با زیاتر له‌هه‌زارو 500 خوێندكارو 150 مامۆستاو كارمه‌ند، ناكام نه‌بن".

له‌به‌شێكى دیكه‌ى نامه‌كه‌یدا مه‌لا به‌ختیار ئاماژه‌ى به‌وه‌شداوه‌، "ڕاسته‌ ئه‌و كۆلێژانه‌، به‌نده‌ كاریگه‌ریم له‌دروستكردن‌و هاوكاریكردنیان هه‌بوه‌، به‌ڵام دڵنیابن، نه‌ ئاگام له‌قۆنته‌راتی دروستكردنی كۆلێژه‌كانه‌، نه‌ تاقه‌ دینارێكی كۆلێژه‌كانیش ده‌زانم چۆن سه‌رفكراوه‌، به‌ڵكو له‌بودجه‌ی خۆم‌و مه‌كته‌بی سیاسیی یه‌كێتیش ئه‌وكاته‌، یارمه‌تیه‌كی بێشومارمان داون".

جه‌ختیشده‌كاته‌وه‌، "حكومه‌تی هه‌رێم، ئه‌گه‌ر نه‌توانێ له‌خانه‌قین‌و كه‌ركوك به‌رگریی له‌ده‌ستكه‌وته‌كانی په‌روه‌رده‌و خوێندنی باڵا بكات، به‌دڵنیاییه‌وه‌، له‌ده‌ستدانی ئه‌م ده‌ستكه‌وتانه‌، تێكشكانی یه‌كه‌مین سه‌نگه‌ری به‌ره‌نگاری كوردستانه‌، به‌رامبه‌ر ته‌عریبی نوێ، بێگومان شكستی تریشی به‌دوادادێ!".