دەستكەوت یان تەحەددا.. هەولێر دواى كشانەوەى ئەمریكا

پوختە

لەگەڵ نزیکبونەوەی کشانەوەی هێزەکانی ئەمریکا لە زۆربەی ناوچەکانی عێراق لە مانگی ئەیلولی داهاتو، هەولێر وەک دوا وێستگە بۆ ئەو هێزانە دەبێتە مەنزڵگە. ئەم گۆڕانکارییە پرسیاری قوڵ دەوروژێنێت سەبارەت بەو سودانەی کە هەرێم دەتوانێت لەم ئامادەبونەدا بەدەستی بهێنێت و ڕادەی ئەو تەحەددایانەی کە ڕەنگە بیخاتەڕو، لە بەرژەوەندى خۆى یەكلابكاتەوە.

ئایا مانەوەى ئەمریكا لە هەولێر، راگوزەر دەبێت یان پێگەى هەرێم بەهێز دەكات؟

شێرزاد مستەفا لێکۆڵەری کاروباری سیاسی پێیوایە بەردەوامیی بونی ئەمریکا پێگەی سیاسی و ئەمنی هەولێر بەهێزتر دەکات. ناوبراو لە لێدوانێکی رۆژنامەوانیى دا رایگەیاند، پاڵپشتیکردنی هێزی پێشمەرگە بە مەشق و کەرەستە، هاوکات لەگەڵ دانانی سیستمی بەرگری بۆ پاراستنی ئاسمانی هەرێم لە فڕۆکەی بێفڕۆکەوان، نوێنەرایەتی گەرەنتییەکی ستراتیژیی دەکات کە زەحمەتە دەستبەرداربون لێی.

هەندێک لە چاودێران هەمان بۆچونیان هەیەو ئاماژە بەوە دەکەن کە چەتری ئەمریکا نەخشە بۆ هاوسەنگیی هێز لەناو عێراقدا دەکێشێتەوە، بەوپێیەی لە دانوستان لەگەڵ بەغدا، بە تایبەتی لە پرسە مشتومڕاوییەکانی وەک بودجە و نەوت، ھێزێکی زیاتر بە کوردستان دەبەخشێت.

ئایا رەهەندى مانەوەى ئەمریكا لە هەولێر تەنها ئەمنییە؟

شێرزاد مستەفا لە درێژەى لێدوانەكەى دا ئاماژە بەوەدەكات كە مەسەلەکە تەنها لە ڕەهەندی ئەمنیى دا سنوردار نییە، بەڵكو دەتوانرێت سودی ئابوری لەڕێگەی بەهێزکردنی متمانەی کۆمپانیا بیانییەکان، بەتایبەتی کۆمپانیا نەوتییەکان، لە وەبەرهێنان لە ناوچەکەدا بەرجەستە بكرێت، لێرەدا شارەزایانی ئابوری ئاماژە بۆ ئەوە دەکەن، سەقامگیریی هەولێر لەژێر پاراستنی ئەمریکادا دەتوانێت ببێتە ژینگەیەکی سەرنجڕاکێشتر بۆ سەرمایەگوزاریى بە بەراورد بە پارێزگاکانی تری عێراق، کە بەردەوام هەڵچونە ئەمنی و سیاسییەکان بەخۆوە دەبینن.

ئایا سیناریۆكە هەروا بە ئاسانى بەسەر هەرێم دا تێدەپەڕێت؟

بەڵام ئەم سیناریۆیە بێ ئاڵۆزیی نییە، چاودێرانی سیاسی هۆشداری دەدەن لەوەی گۆڕانی کوردستان بۆ دوا قەڵای هێزەکانی ئەمەریکا دەتوانێت بیخاتە ناو چەقۆی کوتلە چەکدارەکانەوە کە ئەم ئامادەبونە وەک هەڕەشەیەکی ڕاستەوخۆ بۆ سەر سەروەری عێراق سەیر دەکەن، هەرچەندە هەولێر وەک قەڵغانێکی پارێزەر و هێڵێكى بەهێز بۆ دانوستانى لەگەڵ حكومەتى ناوەند سەیری دەکات، بەڵام ئەم ئامادەبونە دەتوانێت دەرگای گرژیی زیاتر لەگەڵ بەغدا یان زلهێزە ئیقلیمییەکان بکاتەوە.

ئەزمونى رابردوى نێوان هەولێر واشنتۆن چیمان پێدەڵێت؟

ئەزمونی مێژویی ئەوەمان بۆ دەردەخات کە پەیوەندی نێوان هەولێر و واشنتۆن پەیوەندییەکی نوێ نییە،  لەدوای سەپاندنی ناوچەی دژە فڕین لە هەرێمى كوردستان لە ساڵانی نەوەدەکاندا، و تەنانەت لە کاتی شەڕەکانی دژی داعش (2014-2017) چەند رێوشوێنێكى ترى توندى ئەمنی چەسپێنران، کاتێک هێزەکانی ئەمریکا ڕۆڵێکی سەرەکییان بینی لە پشتیوانیکردنی پێشمەرگە، بەڵام تایبەتمەندی قۆناغی داهاتو لەوەدایە کە هەرێم تاکە بنکەی سەربازی ئەمریکا دەبێت لە عێراقدا، ئەمەش قورسایی ستراتیژیی پێدەبەخشێت بەڵام مەترسییەکانیش زیاد دەکات.

دواجار، ئەو دەرەنجامەی شارەزایان دەریدەخەن ئەوەیە کە هەولێر ڕوبەڕوی هاوکێشەیەکی ناسک دەبێتەوە، سود لە بەردەوامیی بونی هێزەکانی ئەمریکا وەک فاکتەرێکی سەقامگیرکەر و تۆكمەبونى نفوز لە ناوخۆ و دەرەوە وەردەگرێت، بەڵام لە هەمان کاتدا، تێدەگات کە ئەم ئامادەبونە دەتوانێت بیخاتە ناو دڵی ململانێ ناوچەییەكان و لێکەوتە ترسناکەکانی لێبکەوێتەوە، كەواتە لە  نێوان دەستکەوتەکان و مەترسییەکان، پرسیارەکە هەر دەمێنێتەوە: ئایا هەرێم سەرکەوتو دەبێت لە گۆڕینی ئەم ئامادەبونە بۆ هێزێکی زیادکراو، یان تێچوی سیاسی و ئەمنیی لە قازانجەکانی زیاتر دەبێت؟.