هەینی ڕەش، بێدەنگکردنی ڕۆژنامەنووسانی ئازاد بە مووشەک و ئاگر

ئیرادە میدیا

ساڵێك له‌مه‌وبه‌ر درۆنێكى توركى، ئۆتۆمبێلێكى مه‌ده‌نیى كرده‌ ئامانج‌ و به‌هۆیه‌وه‌ دوو كچه‌ ڕۆژنامه‌نوس شه‌هیدبون‌ و شۆفێرى ئۆتۆمبێله‌كه‌ش به‌سه‌ختى برینداربوو.

ساڵێك به‌ر له‌ئێستا چى ڕویداو پارتى چى وت‌ و قوباد تاڵه‌بانى چۆن وه‌ڵامیدایه‌وه‌؟

بەرەبەیانێکی  ئاسایی  ڕۆژی هەینیبوو گۆرا بۆ ڕۆژێکی ڕەش و خوێناوی، کاتێک ژمارەیەک ڕۆژنامەنووس بەمەبەستی تۆمارکردنی دۆکیومێتاریەک ڕوو لە ناوچەی هەورامان لە پارێزگای سلێمانی دەکەن، بەڵام لە ڕێگا و لە نزیک گوندی تەپەڕەشی سەر بە سەیدسادق ئوتومبیلەکانیان لەلایەن فڕۆکەی بێ فڕۆکەوانی تورکیەوە دەکرێتە ئامانج و  بەهۆیەوە هەردوو ڕۆژنامەنوس گوڵستان تارا و هێرۆ بەهادین شەهید بوون و شۆفێری ئوتومبێلەکەش بە سەختی برینداربوون. 

هێشتا ئاگر و دوکەڵ لە ئوتومبیلی  ڕۆژنامەنووسان بەرزدەبوویەوە، دەزگای دژە تیرۆری پارتی خێراتر لە هەموو ئاژانس و ڕۆژنامەکان ڕاگەیاندراوێکی بڵاوکردەوە و ڕایگەیاند کە درۆنی تورکی ئوتومبێلێکی پارتی کرێکارانی کوردستانی کردووەتە ئامانج و بەهۆیەوە سەرکردەیەک و دوو پاسەوانی کوژراون.

قوباد تاڵه‌بانى چۆن وه‌ڵامى دژه‌تیرۆرى پارتى دایه‌وه‌؟

بەڵام هەر زووو قوباد تاڵەبانی جێگری سەرۆکی حکومەت هەواڵەکەی دژە تیرۆری پارتی  بە درۆ خستەوە و ڕایگەیاند ئەوانەی کراونەتە ئامانج ڕۆژنامەنووس بوون نەک چەکدار، هێرشەکەش بۆسەر ڕۆژنامەنووسان بووە.

ڕۆژى 14ى 9ى 2024 له‌مه‌راسیمى كردنه‌وه‌ى مۆنۆمێنتی (پارێزەرانی حەقیقەت‌) بۆ ڕۆژنامەنوسانی شەهید كه‌ ناوى 551 ڕۆژنامه‌نوسى تێدا تۆماركراوه‌، قوباد تاڵه‌بانى له‌وه‌ڵامێكدا بۆ دژه‌تیرۆرى پارتى وتى:"ئه‌م 551 ڕۆژنامه‌نوسه‌، پاڵه‌وانى ڕاسته‌قینه‌ى ئێمه‌ى گه‌لى كوردن، به‌ڕاستى ئێوه‌ پاڵه‌وانى ئێمه‌ بون‌و ئازایه‌تیتان هه‌رگیز له‌بیر ناكرێت".

هەریەکە لە ڕێکخراوی پەیامنێرانی بێ سنوور و کۆمیتەی پاراستنی ڕۆژنامەنووسان و فیدراسۆنی  نیودەوڵەتی ڕۆژنامەنووسان  هەر زوو ئیدانەی ئەو هێرشە تیرۆریستیانەیان کرد و دواتریش هەریەک لە یونسکۆ و هیومان ڕایتس ۆچ ئیدانەی هێرشەکەیان کرد و داوای لیکۆڵینەوەی وردیان لەو ڕووداوە کرد.

لەگەڵ بڵاوبوونەوەی هەواڵەکە و زیادبوونی کاردانەوەکان و ئیدانەکردنی ئەو هێرشە تیرۆریستیە لەلایەن ڕێکخراوە ناوخۆیی و نێودەوڵەتییەکانەوە تورکیا سەرەتا بێدەنگی هەڵبژارد و دواتر بێ بەریبوونی خۆی لە هێرشەکە ڕاگەیاند.

پرسیارکە لێردا ئەوەیە، بۆچی دەزگای دژە تیرۆری پارتی هەواڵیکی لەو شێوەیە بڵاودەکاتەوە؟ بۆچێ هێرشی سەر ڕۆژنامەنووسان  دەشێوێنێت و دەڵیت ئەندامی پەکەکە بوون؟ ئایا ئەمە زانیاری هەڵە بوو؟ یاخود شاردنەوەی تاوانەکانی تورکیا کە خەڵکی سیڤیل و ڕۆژنامەنووس بە ئامانج دەگرێت و دەست ناپارێزێت؟

ساڵێك تێپه‌ڕیى.. هیچ ئاشكرانه‌كرا !

ساڵێك به‌سه‌ر ئه‌و ڕوداوه‌دا تێپه‌ڕیى، به‌ڵام ئه‌نجامى هیچ لێكۆڵینه‌وه‌یه‌ك ئاشكرانه‌كراو تا ئێستا ئەنجامی لێکۆڵینەوەکان ئاشکرا نەکراوە؟.

ماوه‌ى ساڵێكه‌ كه‌سوكارو هاوڕێیانى (گوڵستان تاراو هێرۆ بەهادین) چاوەڕێن بکوژان دادگایی بکرێن، بەڵام کاربەدەستانی خۆجێیی ئەرکی خۆیان بەجێناگەیەنن.

ئه‌وروپاش بێده‌نگى هه‌ڵبژارد!

به‌گوێره‌ى زانیارییه‌كانى ئیراده‌، ڕۆژى 3ى 11ى 2024، دۆسییەی گوڵستان تاراو هێرۆ بەهادین، ڕادەستی نوێنەرایەتی یەکێتی ئەوروپا لەعێراق کرا بۆ ئه‌وه‌ى لێكۆڵینه‌وه‌ى وردى له‌باره‌وه‌ بكه‌ن‌و دواتریش ده‌ره‌نجامه‌كه‌ى بۆ ڕاى گشتیى ئاشكرابكرێت، به‌ڵام ئه‌وروپاش بێده‌نگیى هه‌ڵبژاردو تائێستا هیچى له‌وباره‌یه‌وه‌ نه‌وتوه‌.

دوا به‌دواى ڕوداوه‌كه‌، سه‌رچاوه‌ ئه‌منیه‌كان جه‌ختیانكردوه‌، ئه‌و كرده‌وه‌یه‌ى توركیا، كه‌ تیرۆرکردنی گوڵستان تاراو هێرۆ بەهادین-ى لێكه‌وته‌وه‌، ئه‌نجامى دەستێکی سیخوڕیی‌و ناوخۆیی لەپشتەوه‌یه‌، به‌ڵام ساڵێكه‌ نه‌زانراوه‌ ئه‌و ده‌سته‌ ناوخۆییه‌ سیخوڕییه‌ كێیه ‌.

گوڵستان تاراو هێرۆ بەهادین كێن؟

گوڵستان تارا ساڵى 1983 له‌شارى (ئیلهـ) له‌باتمانى باكورى كوردستان له‌دایكبوه‌، گوڵستان 20 ساڵى ته‌مه‌نى له‌ڕێگه‌ى ڕۆژنامه‌گه‌رى ئازاددا ته‌رخانكردو له‌باكورو ڕۆژئاواى كوردستان كاریكردوه‌و دواجاریش ڕوى له‌باشورى كوردستان كردو له‌كۆمپانیاى چه‌تر وه‌ك ڕاوێژكارى به‌رنامه‌ى سیاسیى خزمه‌تیكردوه‌.

هێرۆ به‌هادین له‌دواى شاڵاوه‌ به‌دناوه‌كانى ئه‌نفال، ساڵى 1992 له‌گوندى تیمارى سه‌نگاو له‌دایكبوه‌، كۆلێژى ئه‌ندازیاریى له‌زانكۆى سلێمانى ته‌واوكردوه‌.


ساڵى 2017و دواى كۆتاییهاتنى خوێندنه‌كه‌ى، له‌كۆمپانیاى چه‌تر وه‌ك كارمه‌ندى به‌شى ته‌كنیك كاریكردوه‌، له‌وێ له‌گه‌ڵ گوڵستان تارا ده‌بنه‌ هاوڕێ‌و ماوه‌ى شه‌ش ساڵ به‌رده‌وامبوه‌ له‌كاركردن.