به‌هۆى هێرشه‌كه‌ى سه‌ر لاله‌زار 100 خانوو 50 ئۆتۆمبێل زیانیان به‌ركه‌وتوه‌

ئیرادە میدیا

به‌گوێره‌ى ئه‌و زانیاریانه‌ى جێگرى پارێزگاى سلێمانى ئاشكرایكرد، له‌گرژیى‌و ئاڵۆزیه‌كانى شه‌وى پێنجشه‌ممه‌ له‌سه‌ر هه‌ینى شارى سلێمانى، 100 خانو و 50 ئۆتۆمبێلیى هاوڵاتیانیش له‌ده‌وروبه‌رى لاله‌زار زیانیان به‌ركه‌وتوه‌و به‌شێك له‌ئۆتۆمبێله‌كانیش سوتاون.

بەرەبەیانی ڕۆژی هەینی هێزێکی زۆی ئەمنی سلێمانی بەمەبەستی دەستگیرکردنی لاهور شێخ جەنگی سەرۆکی بەرەی گەل، هێرشیانکردەسەر هۆتێل لالەزارو شوێنی حەوانەوەی ناوبراو، دوای شەڕێکی قورس کە جۆرەها چەکی قورسی تێدا بەکارهات‌و نزیکەی چوار کاتژمێری خایاند، خۆیی‌و دوو برایی‌و خوشکێکی دەستگیرکران‌و چەند کەسێکیش کوژران‌و برینداربون.

جگە لەهۆتێلی لالەزارو خانوو و باڵەخانەكانی دەوروبەری، زیانێکی گەورە بەر كۆشكێکی نزیک شوێنی ڕوداوەکەش كەوتوه‌ كە هی وەبەرهێنەرێكی سلێمانییە، ئەم كۆشكە هەر ئەوەنییە كە جێگەی فیشەكی چەكی سوك‌و بیكەیسی‌و ئاڕ پی جی پێوەبێت، بەڵكو شوێنی گولـلە تۆپی پێوەیە، زۆرترین گولـلەو موشەك ئاراستەی ئەو کۆشکە کراوه‌ كە زیانه‌كانى به‌دەیان هەزار دۆلار دەخەمڵێندرێت.

به‌گوێره‌ى زانیارییه‌كان، "زیان بەخانوو و ئۆتۆمبێلی چوار گەڕەكی سلێمانی كە دەكەونە دەوروبەری لالەزار كەوتون، سەرچنار، كانی كوردە، قلیاسان‌و میران سیتی، دەیان خانوو لەو چوار گەڕەكە كە ژمارەكە به‌گوێره‌ى خەمڵاندنە سەرەتاییەكان نزیكەی 100 خانوە زیانیان پێگەیشتوە، خانوش هەیە گولـلە تۆپی دەبابەی بەركەوتوه‌".

ئه‌وه‌شى زانراوه‌، نزیكەی 50 ئۆتۆمبێلی هاوڵاتیانیش زیانیان بەركەوتوە، گولـلەو پارچەی تەقەمەنی بەر جام‌و تایەو لاشەی ئۆتۆمبێلەكان كەوتون ژمارەیەكیشیان سوتاون.

له‌وباره‌یه‌وه‌ شاهۆ عوسمان جێگری پارێزگاری سلێمانی سەبارەت بەزیانەكان ئاشكرایكردوه‌، چەند تیمێك دەستیان بەگەڕان بەناو گەڕەكەكان كردوەو دەیانەوێ قەبارەی زیانەكان بزانن، هەر كەسێك زیانی بەركەوتبێت قەرەبوو دەكرێتەوە.

لەلایەکی دیکەوە، میدیاى نزیك له‌پارتى ورده‌كاریى ئه‌و چه‌كانه‌ى ئاشكراكرد، كه‌ له‌لایه‌ن هێزه‌ ئه‌منیه‌كانه‌وه‌ دژى لاهور شێخ جه‌نگى‌و لاله‌زار به‌كارهێندراون و ده‌ڵێت:"150 درۆنى بۆمبڕێژكراوو چاودێریى به‌كارهێنراون‌و به‌لاله‌زاردا ته‌قێندراونه‌ته‌وه‌".

له‌و زانیاریانه‌ى ئاشكراكراون، "نزیكه‌ى هه‌زار هاوه‌ن به‌لاله‌ زاره‌وه‌ نراوه‌و نۆ تانك به‌شداریى شه‌ڕه‌كه‌ى كردوه‌، 100 موده‌ڕه‌عه‌و 150 باجه‌رى ئاسایش كۆماندۆ دژه‌تیرۆر بۆ سێ كاتژمێر له‌لاله‌زاریان داوه‌".