مارك ساڤایا یه‌كه‌م لێدوانى له‌باره‌ى عێراقه‌وه‌ بڵاوكرده‌وه‌

مارک ساڤایا نێردەی تایبەتی ئەمریکا بۆ عێراق کە بەڕەچەڵەک عێراقییە، لەیەکەم لێدوانیدا دوای دەستبەکاربوونی ڕایگەیاند، دەیەوێت جارێکی دیکە عێراق گەورە بکاتەوەو لەڕێگەی دروستکردنی پردی پتەو لەگەڵ ئەمریکادا، ئاشتیی‌و سەقامگیریی بۆ وڵاتەکە بەدیبهێنێت.

ئەمڕۆ شەممە مارک ساڤایا بازرگانی ئەمریکیی بەڕەچەڵەک عێراقی ڕایگەیاند، دەیەوێت جارێکی دیکە عێراق گەورە بکاتەوە.

ئەمە دوای چەند ڕۆژێک دێت لەدەستنیشانکردنی وەک نێردەی تایبەتی ئەمریکا بۆ عێراق لەلایەن دۆناڵد ترەمپ سەرۆکی ئەمریکاوە.

ساڤایا لە لێدوانێکدا بۆ ڕۆژنامەی "کلدان پرێس"، وتوویەتی:"دەمەوێت جارێکی دیکە عێراق گەورە بکەمەوە، ئه‌ویش لەڕێگەی دروستکردنی پردی پتەو لەگەڵ ویلایەتە یەکگرتووەکانەوە، ئاشتیی‌و سەقامگیریی لەوڵاتەکەدا بەدیبهێنم، هه‌رچه‌ند عێراق ڕۆژ بەڕۆژ باشتر دەبێت‌و هیچ سنوورێکیش بۆ تواناکانی نییە".

دۆناڵد ترەمپ ڕۆژی یەکشەممەی ڕابردوو، بەشێوەیەکی چاوەڕواننەکراو لەپۆستێکدا لەهەژماری خۆی لەتۆڕی "تروس سۆشیاڵ"، ڕایگەیاندبوو، مارک ساڤایا پۆستی نێردەی تایبەتی بۆ عێراق وەردەگرێت.