ئەحمەد شەرع له‌سه‌ر ناوهێنانى به‌تیرۆریست هاته‌ده‌نگ‌و باسى كورد ده‌كات

ئەحمەد شەرع له‌سه‌ر ناوهێنانى به‌تیرۆریست هاته‌ده‌نگ‌و ڕایده‌گه‌یه‌نێت، "ناوهێنانم وەک تیرۆریست سیاسییە"، ده‌شڵێت، "هەمووان دەزانن کێ تیرۆریستە، سوریا دەوڵەتی یاساییەو مافی هەموو پێکهاتەکانیش دەپارێزرێت‌و كوردیش چاوى منن".

ئەحمەد شەرع سەرۆکى سوریا لەدەوحەی پایته‌ختى قەتەرەوە وتى، "ڕاستە من زیاتر لە 20 ساڵ شەڕکەر بووم، بەڵام بۆ تەنها جارێکیش زیانم بەخه‌ڵکی سڤیل نەگەیاندوە، ناوهێنانیشم وەک تیرۆریست سیاسییەو هەمووانیش باشدەزانن‌و بۆیان ڕوونە کە کێ تیرۆریستە".

شه‌رع ڕاشیگه‌یاند، "سوریا دەوڵەتی یاساییەو مافی تەواوی پێکهاتەکانیشى تێدا پارێزراوە، پاش چوار ساڵی دیکەش هەڵبژاردن ئەنجامدەدرێت، لەدەستوری وڵاتەکەدا هەمووان یەکسان دەبن، ژنانیش لەدامەزراوەکانی حکومەتی‌و پەرلەمان بوونیان هەیەو دەبێت".

سه‌باره‌ت به‌پرسى كوردیش له‌سوریا، ئه‌حمه‌د شه‌رعى سه‌رۆكى سوریا جه‌ختیكرده‌وه‌، "گه‌لى کوردی زوڵم لێكراون، گه‌لى کورد چاوی منن".

سەرۆکی سوریا ئه‌وه‌شى وت، "ئیسرائیل هێرشیکردوەتەسەر سنورەکانی سوریاو دیمەشقیش هیچ وەڵامێکی نەبووە، دەشبێت ئیسرائیل ئەوە بزانێت کە ئارامیی‌و سەقامگیریی سوریا دەبێتە ئارامیی بۆ ئیسرائیل".