رێكخراوی هەرانا: تائێستا لە خۆپیشاندانەكانی ئێران دوو هەزار و 571 كەس كوژراون

ناوەندی هەواڵ

حكومەتی ئێران كوژرانی زیاتر لە 100 ئەندامی هێزە ئەمنییەكانی لە ناڕەزایەتییەكاندا راگەیاند،  رێكخراوێكیش ئاشكرای دەكات زیاتر لە دوو هەزار و 500 خۆپیشاندەر كوژراون  كە ژمارەیەكیان كورد بون، سەرۆكی ئەمریكاش هۆشداریی دەداتە لێپرسراونی تاران.

رێكخراوی مافی مرۆڤی هەرانا بڵاویكردوەتەوە لە ماوەی 17 رۆژی ناڕەزایەتییەكانی ئێران دوو هەزار و 571 خۆپیشاندەر كوژراون كە 12 كەسیان تەمەنیان لە 18 ساڵ كەمتر بوە.

رێكخراوەكانی مافی مرۆڤی رۆژهەڵاتی كوردستان ئاشكرایان كردوە زیاتر لە 20 هاوڵاتی كورد لە شارەكانی تاران و كرماشان و ئیلام كوژراون.

میدیای ئێرانیش بڵاویكردوەتەوە زیاتر لە 100 ئەندامی هێزە ئەمنییەكان لە ناڕەزایەتییەكاندا كوژراون و سەرجەمیان ئەمڕۆ لە مەراسیمێكدا لە تارانی پایتەخت بەرەوگۆڕستان بەڕێدەكرێن.

 سەعید ئیرەوانی، نوێنەری هەمیشەیی ئێران لە نەتەوەیەكگرتوەكان رایگەیاندوە، ئەمریكا لە رێگەی دروستكردنی گرژی و ئاژاوە لە ناوخۆی ئێران دەیەوێت بیانو بێنێتەوە بۆ هێرشكردنە سەر وڵاتەكە.