هەولێر؛ ئەمساڵ مەراسیمی فەرمی بۆ نەورۆز ئەنجام نادرێت

ناوەندی هەواڵ

ئومێد خۆشناو، پارێزگاری هەولێر، تەواوبوونی ئامادەکارییەکانی پارێزگاکەی بۆ پێشوازیکردن لە جەژنی ڕەمەزان و نەورۆز ڕاگەیاند،  ئاماژەی بەوەشکرد،  پلانێکی تۆکمە بۆ پاراستنی ئارامی و دابینکردنی خزمەتگوزارییەکان لە ڕۆژانی پشوودا جێبەجێ دەکرێت.

پارێزگاری هەولێر  بەمیدیاکانی وت، هەموو فەرمانگە خزمەتگوزارییەکان، نەخۆشخانەکان و دەزگا فریاگوزارییەکان خراونەتە حاڵەتی ئامادەباشییەوە و بەبێ پشوو کار دەکەن. جەختیشی کردەوە کە هێزە ئەمنییەکان لە هەماهەنگیدان بۆ پاراستنی سەقامگیری

 ئومێد خۆشناو هۆشداری دا کە ڕێگە نادەن لە ڕۆژانی پشوودا هیچ زێدەڕۆییەک بکرێتە سەر زەوی و موڵکی دەوڵەت و سەرپێچیکاران ڕووبەڕووی یاسا دەکرێنەوە.

لەبارەی مەراسیمەکانی نەورۆزەوە، پارێزگاری هەولێر ڕایگەیاند،  بەهۆی ڕەوشی ناوچەکەوە، ئەمساڵ پارێزگا هیچ مەراسیمێکی فەرمی ساز ناکات، بەڵام هاووڵاتیان ئازادن لە ئەنجامدانی کەرنەڤاڵی جەماوەری و کردنەوەی ئاگری نەورۆز، بەو مەرجەی پابەندی ڕێسا و پاراستنی ئارامی بن.