"یەك یەك ڕاویان دەكەین"

دوای لاریجانی ئیسرائیل كوژرانی وەزیری ئیتڵاعاتی ئێرانی راگەیاند

ناوەندی هەواڵ

  ئیسرائیل بە ئامانجگرتنی ئیسماعیل خەتیب وەزیری ئیتڵاعاتی لەهێرشێكی شەوی رابردوودا ڕاگەیاند، ئەمەش دوای رۆژێك دێت لە كوژرانی عەلی لاریجانی سەرۆكی ئەنجومەنی باڵای ئاسایشی نەتەوەیی ئێران، كە ئیسرائیل ڕایگەیاند و پاشان ئێران پشتڕاستیكردەوە.
ئیسرائیل كاتز، وەزیری بەرگریی ئیسرائیل رۆژی چوارشەممە 18-3-2026 كوژرانی ئیسماعیل خەتیب، وەزیری هەواڵگری ئێران (ئیتڵاعات) ی لە بۆردومانێكی شەوی ڕابردوودا لە تاران ڕاگەیاند.وەزیری بەرگریی ئیسرائیل جەختی كردەوە هێرشەكانیان بۆسەر ئێران بەردەوام دەبێت، وتیشی "هیچ بەرپرسێكی ئێرانی پارێزراو نییە و هەموویان لە لیستی تیرۆركردندان و یەك بە یەك راویان دەكەین".

ئیسماعیل خەتیب وەزیری ئیتڵاعاتی ئێران لە ساڵی 2021 ەوە لەو پۆستەدایە،یەكێك بوو لە نزیكەكانی عەلی خامنەیی رابەری پێشووی باڵای شۆڕشی ئیسلامی ئێران كە لە هێرشی ئەمریكا و ئیسرائیل لە 28 ی شوباتی ئەمساڵ بە ئامانجگیرا.
ئیسماعیل خەتیب، پێش ئەوەی وەزیری ئیتڵاعات بێت، بەرپرس بووە لە بەرەنگاربوونەوەی سیخوڕی، بۆیە كوژرانی گورزێكی قورس دەبێت بۆ دەزگا ئەمنیەكانی ئێران.

رۆژی سێشەممە ئیسرائیل كوژرانی هەریەك لە عەلی لاریجانی سەرۆكی ئەنجومەنی باڵای ئاسایشی نەتەوەیی ئێران، و غوڵام رەزا سولەیمانی فەرماندەی هێزی بەسیجی ئێرانی لە دوو هێرشدا لە تاران ڕاگەیاند، هەمان رۆژ ئێران كوژرانی هەردوو بەرپرسە باڵاكەی پشتڕاستكردەوە.

پێشتر چەندین جار ئیسرائیل هەڕەشەی بە ئامانجگرتنی بەرپرسانی باڵای ئێرانی كردووە، لەكاتێكدا لە یەكەم رۆژی هێرشی ئەمریكا و ئیسرائیل بۆسەر ئێران لە 28 ی شوباتی 2026 عەلی خامنەیی رابەری باڵای شۆڕشی ئیسلامی ئێران بە ئامانجگیرا، ئێستاش بنیامین نەتەنیاهۆ سەرۆكوەزیرانی ئیسرائیل و بەرپرسانی باڵای تری ئیسرائیل، هەڕەشەی بە ئامانجگرتنی موجتەبا خامنەیی سێیەم رابەری ئێران دەكەن كە پاش بە ئامانجگیرانی باوكی وەك رابەر دەستنیشانكرا، لەگەڵ ئەوەشدا هەڕەشەی ئەوە دەكەن ژمارەیەك بەرپرسی سیاسی و سەربازیی تری ئێران بە ئامانج دەگرن، ئامانجی ئیسرائیلیش ئەوەیە لەو رێگەیەوە سەقامگیری ناوخۆی ئێران تێكبدات، هەرچەندە دوای سێ هەفتە لە جەنگ ئامانجی ئەمریكا و ئیسرائیل بۆ رووخاندنی رژێمی ئێران بەدینەهاتووە