گرووپە چەکدارەکان هەڕەشە لە زەیدی دەکەن و داوای هەڵوەشاندنەوەی پێشمەرگە دەکەن

بەرپرسی ئەمنی گرووپەکانی بەرگری (میلیشیاکانی عێراق) لە ڕاگەیەندراوێکدا بە توندی هەڕەشەی لە عەلی زەیدی، سەرۆک وەزیرانی عێراق کرد. لە ڕاگەیەندراوەکەدا جەخت لەوە کراوەتەوە کە ئارامگرییان بەرامبەر ڕەفتارەکانی زەیدی بەرەو کۆتایی دەچێت.

 هاوکات سێ مەرجی سەرەکییان بۆ کارکردن لەگەڵ هەر حکومەتێک دیاری کردووە: دەرکردنی تەواوەتی هێزەکانی ئەمریکا، دەرکردنی هێزەکانی تورکیا لە باکووری عێراق، لەگەڵ هەڵوەشاندنەوەی هێزەکانی پێشمەرگە بەوپێیەی بە "مەترسیدارترین میلیشیا بۆ سەر یەکپارچەیی عێراق" وەسفیان کردووە.

ئەو گرووپانە نووسیویانە "ئێمە زیاتر لە سەد رۆژ ئاراممان گرت لەسەر قسە و رەفتارە بەتاڵەکانی سەرۆکی راسپێردراوی حکومەت، گەنجەکە "عەلی زەیدی"؛ بەو هیوایەی لە هاوکێشەی ناوخۆیی و هەرێمی و نێودەوڵەتی تێبگات و گوێ لە ئامۆژگارییەکانی سیاسییە بەئەزموون و بەتەمەنەکان بگرێت، بەڵام هیچ پێشکەوتنێکمان لە تێگەیشتنی بۆ بارودۆخە ئاڵۆزەکانی عێراق و ناوچەکە لێ نەبینی، بەڵکو بەپێداگریی لەسەر گوێگرتن لەوانەی دوژمنایەتی شیعەی ئیمامی عەلی دەکەن، سەرۆکی دەستەی تەحریری عێراق و شام و (گیرفانبڕ) تۆم باراک، بەڵاکەی گەورەتر کرد".

پەیامی سێ سەرۆکایەتییەکە و پرسی کۆکردنەوەی چەک

لە بەرامبەردا، هەرسێ سەرۆکایەتییەکەی عێراق کۆبوونەوە و جەختیان لەسەر پشتیوانیکردنی بەرنامەی حکومەت کردەوە. لە کۆبوونەوەکەدا تاوتوێی بەهێزکردنی ئابووری، ڕووبەڕووبوونەوەی گەندەڵی و بەتایبەتی چەسپاندنی هەژموونی دەوڵەت ڕاگەیەندرا لە ڕێگەی کۆکردنەوەی چەک لە دەستی دەوڵەتدا، بەتایبەت دوای کشانەوەی هێزەکانی هاوپەیمانی نێودەوڵەتی. هەروەها جەخت لەسەر ڕەتکردنەوەی بەکارهێنانی خاکی عێراق بۆ هێرشکردنە سەر وڵاتانی دراوسێ کرایەوە.

فشاری داماڵینی چەک و ئاڵۆزییە ئەمنییە نوێیەکان

لە کاتێکدا دوا مۆڵەت بۆ داماڵینی چەکی گرووپەکان ۳۱ی ئەیلولە، زانیارییەکان ئاماژە بەوە دەکەن کە فشاری ئێران بووەتە هۆی پاشەکشەی هەنگاوەکانی حکومەت لەم بڕیارەدا. هاوکات کەناڵی "حەدەس"ی عەرەبی ئاشکرای کردووە کە گرووپە چەکدارەکان پلانێکیان بۆ تیرۆرکردنی فایەق زەیدان، سەرۆکی ئەنجومەنی باڵای دادوەری لە ڕێگەی درۆنەوە داڕشتووە کە پەیوەندی بە دۆسیەی چەکداماڵینەوە هەیە. ئەم پێشهاتانە لە کاتێکدان کە دوێنێ هێرش کرایە سەر نووسینگەی مەسرور بارزانی لە پیرمام، کە وەزیری دەرەوەی ئێران ئەنجامدانی ئەو هێرشەی لەلایەن تارانەوە ڕەتکردەوە.