ڕێبوار هادی: هیچ كۆبوونەوەیەكی بەپەلە بۆ هەڵبژاردنی سەرۆكی پەرلەمان ناكرێت

ناوەندی هەواڵ

سەرۆكی لیژنەی یاسایی لە پەرلەمانی عێراق ڕایگەیاند، هیچ دانیشتنێكی بەپەلە بۆ هەڵبژاردنی سەرۆكی پەرلەمانی عێراق ئەنجام نادرێت، چونكە ئەو پرسە پێویستی بە كۆدەنگی سیاسیی هەیە.

ڕێبوار هادی، سەرۆكی لیژنەی یاسایی لە پەرلەمانی عێراق سەبارەت بە كۆبوونەوەی پەرلەمان بۆ هەڵبژاردنی سەرۆكێكی نوێ ڕاگەیاندراوێكی بڵاو كردەوە.

ڕێبوار هادی ڕایگەیاند، ئێستا ئەندامانی پەرلەمان لە پشووی خۆیانن، هەروەها باس لە دانیشتنی بەپەلە سەبارەت بە هەڵبژاردنی سەرۆكی پەرلەمان ناكرێت.

جەختی لەوەشکردەوە، پرسی هەڵبژاردنی سەرۆكی پەرلەمان پێویستی بە كۆدەنگی سیاسیی هەیە، تا ئێستاش كۆدەنگی لەسەر هەڵبژاردنی سەرۆكی پەرلەمان نییە.

ڕۆژی 14ی تشرینی دووەمی ساڵی ڕابردوو، دادگای فیدراڵی عێراق بڕیاریدا بە دوورخستنەوەی محەمەد حەلبووسی سەرۆك پەرلەمانی عێراق بە تۆمەتی ساختەكردن و گەندەڵی، حەلبووسی جگە لە سەرۆكی پەرلەمان، لە هەمان كاتدا سەرۆكی حزبی تەقەدووم و هاوپەیمانی سیادەیە، لە ساڵی 2018 وە لە پۆستی سەرۆكایەتی پەرلەماندایە.