دارایی عێراق دەست بە دابەشکردنی مووچەی مانگی حوزەیران دەکات

ناوەندی هەواڵ

لە سبەینێ یەکشەممە، 23/6/2024، بەشی ژمێریاری لە وەزارەتی دارایی دەست بە ڕێکارەکانی دابینکردنی دارایی مووچەی فەرمانبەرانی دەوڵەت و ئەندامانی هێزە ئەمنییەکان دەکات بۆ مانگی حوزەیران.

لە هەرێمی كوردستان، حكومەت لە رۆژی 11ی حوەزیرانەوە دەستی بە دابەشكردنی موچەی مانگی ئایار كردو دواینجار لە رۆژی 14ی حوزەیران موچەی خانەنشینانی پێشمەرگەو هێزەكانی ناوخۆ دابەشكرا، بەڵام هێزە ئەمنییەكانی هەرێم هێشتا موچەی مانگی ئایاریان بۆ خەرج نەكراوە.

ئەمڕۆ شەممە 22-6-2024، بەشی ژمێریاری لەوەزارەتی دارایی حكومه‌تى عێراق لە نوسراوێکدا بڵاویکردەوە،  له‌سبه‌ینێ یه‌كشه‌ممه‌وه‌ دەست بەڕێکارەکانی دابینکردنی دارایی مووچەی فەرمانبەرانی دەوڵەت و ئەندامانی هێزە ئەمنییەکان ده‌كرێت بۆ مانگی شه‌ش.

بەڕێوەبەرایەتییەکە داواى لەیەکەکانی خەرجکردن لەوەزارەتەکان کرد، بۆ ناردنی نوێنەرە ڕێگەپێدراوەکانیان بۆ تەواوکردنی مەرجەکانی دابینکردنی دارایی مووچەی فەرمانبەران‌و ئەندامەکانیان، لەگەڵ دڵنیابوون لە پابەندبوون بە خشتەی پارەدارکردنی مانگانەی پەسەندکراو و جێبەجێکردنی هەموو پێداویستییە داراییە پێویستەکان.

ئەوە لەکاتێکدایە،  تائێستا وه‌زاره‌تى دارایی حكومه‌تى هه‌رێم لیستى موچه‌ى فه‌رمانبه‌رانى هه‌رێمى بۆ مانگى شه‌ش ڕه‌وانه‌ى به‌غدا نه‌كردوه‌ و ناشزانرێت كه‌ى لیسته‌كه‌ ڕه‌وانه‌ ده‌كات.