وەزیری نەوت: عێراق هاوردەکردنی غاز رادەگرێت

ناوەندی هەواڵ

وەزیری نەوتی عێراق ڕایگەیاند،  غازی ئێران سەرچاوەیەکی سەرەکییە لە دابینکردنی سوتەمەنی بۆ وێستگەکانی کارەبا، بەڵام بڕی غازی هاوردەكراو بەشی سەرجەم وێستگەكانی كارەبا ناكات، دەشڵێت، بڕی بەرهەمهێنانی غاز لە عێراق دوو هەزار ملیۆن پێ سێجای تێپەڕاندووە.

ئەمڕۆ سێ شەمە 25ی حوزەیرانی 2024 حەیان عەبدول غەنی وەزیری نەوتی عێراق ڕایگەیاند، بەردەوامین لە جێبەجێكردنی هەشت پڕۆژەی گەورە بۆ وەبەرهێنان لە غازی سروشتی، جگە لەوەش قۆناغی یەكەمی پڕۆژەی وێستگەی وزەی خۆر لە ساڵی داهاتوودا تەواو دەبێت، كە ئەو پڕۆژە توانای دابینكردنی 250 مێگاوات كارەبای دەبێت.

ئاماژەی بەوەشكرد، لە ئێستادا هاوردەكردنی غازی ئێران بە مەبەستی كارپێكردنی وێستگەكانی كارەبا بەردەوامە، بەڵام بڕی غازی هاوردەكراو بەشی سەرجەم وێستگەكانی كارەبا ناكات.

وتیشی، كۆمەڵێك ڕێككەوتنمان ئەنجامداوە بۆ وەبەرهێنانی غاز، بە جێبەجێكردنی سەرجەم پرۆژەكانیش لەبواری غاز و وزەی خۆر، هاوردەكردنی غاز لە ئێرانەوە ڕادەگرین.

جێگەی ئاماژەیە، ئێستا عێراق لە هەوڵدایە بۆ ڕێگە گرتن لە بەفیڕۆچوونی غازی سروشتی، بۆ ئەو مەبەستەش چەندین ڕێككەوتنى لەگەڵ كۆمپانیا جیهانییەكان واژۆ كردووە.