عەبادى: داوای هەڵوێستی نیشتمانی لە عێراق و هەرێم دەکات بۆ ڕاگرتنى دەستدرێژیی و پێشێلکارییەکانى تورکیا لەناو خاکی هەرێم

ناوەندی هەواڵ

هاوپەیمانى نەسر کە حەیدەر عەبادى سەرۆکایەتی دەکات ، لە ڕاگەیەندراوێکدا، سەرکۆنەى لەشکرکێشى سوپاى تورکیا لە شارۆچکەى ئامێدى سەربە پارێزگاى دهۆک دەکات و داوا لە  حکومەتى عێراق و هەرێمى کوردستان و لایەنە سیاسییەکان دەکات، هەڵوێستێکى نیشتمانیی بگرنەبەر بۆ ڕاگرتنى دەستدرێژیی و پێشێلکارییەکانى تورکیا دەرهەق بە عێراق  لەناو خاکی هەرێمی کوردستان.

هاوپەیمانى نەسر لە ڕاگەیەندراوێکدا دەڵێت، سەرکۆنەى ئەو پێشێلکارییە مەترسیدارە دەکەین کە سوپای تورکیا دەیکات و بازگەى سەربازى لەنێوان بامەڕنێ و ئامێدى داناوە.

ئاماژە بەوەشدراوە، بەردەوامبوونى تورکیا لە بەزاندنى سەروەریى عێراق، پەیوەندییەکانى هەردوو وڵات بەرەو ئاڵۆزییەکى گشتگیر دەبات و ناکرێت لە هیچ دۆخێکدا پاساو بۆ ئەو پێشێلکارییانە بهێنرێتەوە.

هاوپەیمانیى نەسر داوا لە حکومەتەتی عێراق و هەرێم و  لایەنە سیاسییەکان دەکات، هەڵوێستێکى نیشتمانیی بگرنەبەر و سنوورێک دابنێن بۆ دەستدرێژی و پێشێلکارییەکانى تورکیا.