ئەوروپا نیگەرانە لە زۆربوونی ڕێژەی سزای لەسێدارەدان لە عێراق

ناوەندی هەواڵ

 بەپێی ئامارەکان زیاتر لە هەشت هەزار زیندانی لەعێراق چاوەڕێی جێ بەجێکردنی سزای لەسێدارەدانن،وتەبێژی دەزگای کردەوەی دەرەوەی ئەوروپاش ڕایگەیاندووە، یەکێتی ئەوروپانیگەرانەو بە توندی دژایەتی سزای لەسێدارەدان دەکات لە هەموو کاتێکدا و لە هەموو بارودۆخێکدا، چونکە سزایەکی دڕندانە و نامرۆڤانەیە.

بەپێی هەواڵێکی ئاژانسی هەواڵی "ئاکی"ی ئیتاڵییەوە کە ئەمڕۆ هەینی بڵاوکراوەتەوە،  پیتەر ستانۆ، ئاماژەی بەوەشکردووە، یەکێتی ئەوروپا داوا لە عێراق دەکات ڕاگرتنی کاتی سزای لەسێدارەدان وەک هەنگاوی یەکەم بگرێتەبەر، کاری بەردەوامیش دەکات بۆ هەڵوەشاندنەوەی سزاکە لەو وڵاتانەی کە تا ئێستا جێبەجێی دەکەن.

ئەوە لەکاتێکدایە، ڕۆژی چوارشەممە 25ی ئەیلوول، سەرچاوەیەکی ئاگاداری ئەمنی ڕایگەیاند، کە وەزارەتی دادی عێراق حوکمی لەسێدارەدانی بۆ 21 تیرۆریست لەعێراق جێبەجێ کردووە، لە ناویاندا ژنێک هەبووە لە زیندانی ناوەندیی ناسریە (الحوت) لە سەر بە پارێزگای زیقار لە باشووری عێراق.