هێزەکانى ئەمریکا لە عێراق خرانە حاڵەتى ئامادەباشییەوە

ناوەندی هەواڵ

دوای هێرشەکانی ئیسرائیل بۆسەر بارەگاکانی حزبوڵڵای لوبنانی لەباشوری بەیروت، ئەمریکا هێزەکانى لە ڕۆژهەڵاتی ناوەڕاست بەتایبەتی لەبنکەی عەین ئەسەد خستە ئامادەباشییەوە و دەڵێت، هەر کەسێك دەستدرێژی بکات وەڵامی توندمان دەبێت.

لە شەوى رابردوەوە ئیسرائیل هێرشەکانی بۆ سەر حزبوڵڵای لوبنانی چڕکردوەتەوە و بڕیارە دوا نیوەڕۆى ئەمڕۆ 28ی ئەیلولی 2024، ئەنجوومەنى نوێنەرانى عێراق تایبەت بەئاڵۆزییەکانی لوبنان کۆببێتەوە.

ئاژانسی هەواڵی رۆیتەرز لە زاری دوو سەرچاوەی ئەمنییەوە بڵاوی کردەوە، لە دواى بۆردومانەکانی ئیسرائیل بۆسەر بارەگاکانی حیزبوڵا لە باشوری لوبنان، هێزەکانی ئەمریکا لە عێراق، خراونەتە حاڵەتی ئامادەباشییەوە، بەهۆی ئەگەری هێرشی گروپە چەکدارەکانی نزیك لە ئێرانە.

بەوتەى ئەو سەرچاوانە، ئەمریکا هێزەکانی لە تەواوی ڕۆژهەڵاتی ناوەڕاست، خستوەتە حاڵەتی ئامادەباشییەوە، هۆشداریشى داوە لەوەی، هەر کەسێک دەستدرێژی بکاتە سەریان وەڵامی توندیان دەبێت.